Týrıster ýaqytsha arzan qonaqúılerge ornalastyrylǵan, olardyń aıtýynsha, jaǵdaı kóńil kónshitpeıdi: tolyqqandy tamaq berilmegen, al bólmelerge tek túnde kirgizedi.
Sapardan orala almaı otyrǵandardyń arasynda Oksana Kolesnıchenko da bar. Ol qyzymen birge 13 maýsymda Astanaǵa ushýy tıis bolǵan, alaıda áskerı qımyldar bastalǵannan keıin reıs toqtatylǵan.
«Kún saıyn saǵat 12-de bizdi bólmelerden shyǵarady. Júgimizdi súıretip, balalarymyzdy alyp, ary qaraı ne bolatynyn kútip hollda otyramyz. Eshkim eshteńe túsindirmeıdi. Bizge tek tańǵy as beriledi. Qalǵan ýaqytta árkim ózi qalaǵan jerinen tamaqtanady. Biraq, aqshamyz da taýsylyp jatyr», deıdi ol.
Qazaqstan Syrtqy ister mınıstrliginiń resmı ókili Aıbek Smadııarovtyń aıtýynsha, qazir shetelde qalyp qoıǵan azamattardyń sany 300-ge jýyq.
«Qazirgi ýaqytta BAÁ-den Qazaqstanǵa birqatar áýe kompanııalary reısterdi toqtatqandyqtan, 300-ge jýyq azamattyń ushýy ýaqytsha múmkin bolmaı otyr. Olardyń kópshiligi – týrıster. Oqıǵa ornynda bizdiń dıplomattar jumys istep jatyr. Áýe kompanııalarymen kelisim nátıjesinde aldaǵy ýaqytta azamattardyń jartysynan kóbi elge qaıtarylady», dedi ol.
Buǵan deıin FlyDubai áýe kompanııasynyń eki reısi arqyly 332 jolaýshy Almatyǵa jetkizilgen. Osy ýaqytta Qazaqstan áýe tasymaldaýshylaryna Iran, Izraıl, Sırııa, Irak, Iordanııa jáne Lıvan áýe keńistigi arqyly ushýǵa ýaqytsha tyıym salynǵan. Bul jaǵdaı tek BAÁ ǵana emes, Mysyr men Katardan da azamattardy elge qaıtarýdy qıyndatyp jatyr.
Sońǵy tórt kúnde shamamen 2 myń qazaqstandyq elge jetkizilgen. Endi kezek – BAÁ-de qalyp qoıǵandarǵa kelip otyr.
«Emırattyq FlyDubai men Air Arabia kompanııalary reısterdi oryndaýdan bas tartty. Olar máseleni sheshýge, úlken ushaqtardy tabýǵa tyrysyp jatyr. Másele – tolyq otynmen, tolyq júktememen ushyp, keminde Almatyǵa jetý múmkindigine kelip tirelip otyr. Olardyń ushý qashyqtyǵy jeti saǵatty qamtýy tıis, bul barlyq ushaqtyń qolynan kele bermeıdi», dedi «Týrıstik Qamqor» qorynyń tóraıymy Inna Reı.
SCAT avıakompanııasy da óz baǵyttary men kestesine májbúrli ózgerister engizip úlgerdi.
Aıta keteıik, Almatyǵa evakýasııalanǵan jolaýshylar óz qalalaryna óz betimen jetýi tıis — bul úshin qosymsha ótemaqy qarastyrylmaǵan.
