Aýylǵa kómek kóp

Prezıdent janyndaǵy Ortalyq kommýnıkasııalar qyzmetinde ótken   baspasóz máslıhatynda Parlament Májilisiniń depýtattary Roman Kım jáne Álıhan Toıbaev agroónerkásip salasyna qoldaý kórsetýdegi atqarylyp jatqan jumystar jaıynda baıandap berdi. «Nur Otan» partııasynyń XVI sezinde Elbasy aýyl sharýa­shylyǵy máselelerin qozǵaı otyryp, agrarlyq sektordy damytý isine basymdyq bergen bolatyn. Osy turǵyda birqatar máseleler talqy bolǵan jıynnyń mańyzyn túsindirgen Agrarlyq máseleler komıtetiniń múshesi Álıhan Toıbaev «Agrobıznes-2020» baǵdarlamasy aıasynda  aýyl sharýashylyǵy salasyna 3 trln. teńge bólý josparlanyp otyr dep málimdedi. Sonymen qatar, Á.Toıbaev ústi­mizdegi jyldyń eseptik  kórsetkishi boıynsha aýyl sharýashylyǵyna 177 mlrd. teńge sýbsıdııa bólinip otyrǵandyǵyn habarlady. Onyń ishinde 70 mlrd. teńge egin sharýa­shylyǵyna baǵyttalǵan.  Bul  2013  jylmen salystyrǵanda eki ese kóp, degen komıtet múshesi  ol kezdegi sýbsıdııa kólemi 87,2 mlrd. teńge bolǵandyǵyn eske saldy. Sol jyldary aýyl sharýashylyǵy ishki jalpy óniminiń 2,5-3%-y sýbsıdııalansa, qazir ol 6-7%-ǵa artty dep oılaımyn, dedi.  Bizdiń memleketimizde 7 iri aýylsharýashylyq keshenderi bar. Sondaı-aq, 184 myńnan astam kishi aýylsharýashylyq mekemeleri bar. Ol jerde jumys isteıtinder sany 2,5 mıllıonnan asady, degen depýtat bul búkil jumysqa jaramdy adamdardyń 25%-yn  quraıtyndyǵyn tilge tıek etti. Sonymen qatar, Á.Toıbaev bizdiń elde aýyl sharýashylyǵyna edáýir qoldaý kórsetilip jatqandyǵynyń arqasynda bul sala jaqsy damyp kele jatqandyǵyn atap aıtty. Bul turǵyda mysal keltirsek, Almaty oblysynda «Aıdarbaev» sharýa qojalyǵy 1990 jyldary qurylǵan bolatyn. Ol qazirgi tańda memlekettiń qoldaýynyń arqasynda  mıllıardtan astam teńgege taýar shyǵaratyn úlken sharýashylyqqa aınaldy, dep atap kórsetti. Elmıra MÁTIBAEVA, «Egemen Qazaqstan».