Foto: Erlan Omar
Eńbek jáne halyqty áleýmettik qorǵaý mınıstrliginiń málimetinshe, sol kezeńde respýblıkalyq bıýdjet esebinen bala týǵanda beriletin birjolǵy járdemaqyny 145 myń adam alǵan. Osy maqsatqa 26,2 mlrd teńge baǵyttaldy. Al mamyr aıynda bul kómekti 28 myń azamat alyp, tólem kólemi 5,1 mlrd teńgeni quraǵan. Bul járdemaqyny týǵan, asyrap alǵan nemese qamqorshy retinde bala tárbıelep otyrǵan Qazaqstan azamattary, qandastar jáne elde turaqty turatyn sheteldikter ala alady.
«Balaǵa kútim jasaıtyn adam mindetti áleýmettik saqtandyrý júıesine qatysýshy bolyp tabylmaǵan jaǵdaıda týǵan, asyrap alǵan, sondaı-aq qorǵanshylyqqa alǵan balalary bar, eger olar basqa ata-ananyń otbasynda eskerilmese, ógeı balalary bar adamdardyń (otbasylardyń) bala kútimine baılanysty járdemaqy alýǵa quqyǵy bar. Esepti kezeńde 1,5 jasqa tolǵanǵa deıin bala kútimi boıynsha járdemaqymen 18 mlrd teńge somasynda orta eseppen 123,6 myń adam qamtyldy, onyń ishinde mamyr aıynda 3,6 mlrd teńge somasyn 124,9 myń adam aldy», delingen habarlamada.
Aıta keteıik, Memlekettik járdemaqy mólsheri jyl saıyn aılyq eseptik kórsetkishke (AEK) negizdelip esepteledi. 2025 jyldan bastap barlyq járdemaqy kólemi 6,5%-ǵa ındekstelgen.
Bıylǵy bala týýyna baılanysty birjolǵy járdemaqy mólsheri:
- 1, 2, 3-bala úshin – 38 AEK nemese 149 416 teńge;
- 4 jáne odan da kóp bala úshin – 63 AEK nemese 247 716 teńge.
Al bala 1,5 jasqa tolǵanǵa deıin aı saıyn tólenetin kútim járdemaqysy:
- 1-balaǵa – 22 648 teńge;
- 2-balaǵa – 26 777 teńge;
- 3-balaǵa – 30 866 teńge;
- 4 jáne odan keıingi balalarǵa – 34 995 teńge.
Sonymen qatar, jumys isteıtin áıelderge júktilik, bosaný nemese bala asyrap alýǵa baılanysty tabysynan aıyrylǵan jaǵdaıda Memlekettik áleýmettik saqtandyrý qorynan (MÁSQ) arnaıy tólem taǵaıyndalady. Bul tólem eńbekke jaramsyzdyq paraǵynda kórsetilgen barlyq kúnge tólenedi jáne mólsheri sońǵy 12 aıdaǵy ortasha aılyq tabysqa negizdelip esepteledi.
«Atalǵan birjolǵy tólemdi jyl basynan beri jalpy somasy 144,4 mlrd teńgege 100,3 myń adam aldy, onyń ishinde mamyr aıynda 27 mlrd teńge somasyna 22,6 myń adam aldy. 2025 jyldyń 5 aıynda taǵaıyndalǵan tólemniń ortasha mólsheri 1 590 618 teńgeni qurady», delingen habarlamada,
Sondaı-aq, jumys isteıtin ata-analarǵa balasy 1,5 jasqa tolǵanǵa deıin kiristen aıyrylǵan jaǵdaıda MÁSQ arqyly aı saıynǵy tólem qarastyrylǵan. Bul tólem balanyń týǵan kúninen bastap taǵaıyndalyp, sońǵy 2 jyldaǵy ortasha aılyq tabystyń 40%-yn quraıdy. Eger bir ýaqytta birneshe bala dúnıege kelse, tólem ár balaǵa jeke esepteledi.
Atalǵan tólem boıynsha 2025 jyldyń 5 aıynda 109,7 myń adamǵa 183 mlrd teńge tólengen. Onyń ishinde mamyr aıynda 20,9 myń adamǵa 36 mlrd teńge aýdarylǵan. Aı saıynǵy ortasha tólem mólsheri – 90 817 teńgeni quraıdy.
