Jas ofıserlerdi «Ońtústik» óńirlik qolbasshylyǵynyń qolbasshysy general-maıor Talapker Ámireev alǵashqy shenderimen quttyqtap, aldaǵy atqaratyn qyzmetterine toqtaldy. Sondaı-aq qolbasshylyqtyń basshylyq quramyn tanystyryp, el tynyshtyǵyn qorǵaý jolynda ózderine júktelgen mindetti abyroımen atqarýyna senim bildirdi.
- Ulttyq ulan ofıseri qataryna qosylǵan quqyqtyq tártip áskeriniń kelbetin qalyptastyrýshy jas ofıserler, úlken ómirge qadam basýlaryńyz qutty bolsyn! Búgingi tańda ofıserlik quram zamanǵa saı bilikti, bilimdi ári óz isiniń sheberi bolýy tıis. Ulttyq ulan ofıserleriniń boıynda osyndaı qasıetter bar. Dese de, jeke quramdy basqarý ekiniń biriniń qolynan kele bermeıtin is. Ol úshin ózderińdeı jas túlekter tabandy eńbek etip, kásibı biliktiligin udaıy arttyryp otyrýy kerek, - dedi general-maıor Talapker Ámireev.
Jas leıtenanttar Almaty, Shymkent, Túrkistan, Taraz, Qyzylorda, Taldyqorǵan qalasynda jáne Almaty oblysy Alataý qalasyndaǵy Zarechnyı yqsham aýdanynda ornalasqan áskerı bólimderde avtomobıl jáne tyl qyzmetiniń bastyǵy, rota komandıriniń tárbıe jáne áleýmettik-quqyqtyq jumystar jónindegi orynbasary, vzvod komandıri laýazymdarynda qyzmet atqaratyn bolady.
- Bul men úshin úlken jaýapkershilik. Ulttyq ulan ofıseri ataný – tek áskerı shen emes, bul – halyqtyń senimin aqtaý, memlekettiń tynyshtyǵy úshin qyzmet etý degen sóz. Alǵashqy ofıserlik qyzmetimdi Shymkenttegi 6698 áskerı bóliminen bastaǵaly otyrmyn. Memlekettiń kórsetip jatqan qamqorlyǵyna rızashylyǵymdy bildirgim keledi. Qoǵamdyq tártipti saqtap, Otan ıgiligi úshin laıyqty qyzmet etýge árdaıym daıynmyn, - deıdi jas ofıserdiń biri leıtenant Zýhrıdın Saýtov.
Qyzmet oryndaryna attanbas buryn Ulttyq ulan Akademııasynyń túlekteri úshin oqý-ádistemelik jıyn uıymdastyrylǵan. Jıyn barysynda túlekterdiń qyzmettik-jaýyngerlik qoldaný taktıkasy, jalpy áskerı jarǵylar, áskerı pedagogıka men psıhologııa, tehnıkalyq jáne dene daıyndyǵy boıynsha bilimderi men mashyqtary tekserildi. Bul kezeń olardyń kásibı qyzmetke tolyq daıyn ekendikterin baǵalaýǵa múmkindik berdi.
Aıta keteıik, bıyl Qazaqstan Respýblıkasynyń Ulttyq ulan Akademııasyn 200-ge jýyq túlek bitirdi. Qazaqstandyq túlektermen birge Tájikstan Respýblıkasynyń tórt ókili dıplom alǵan.
