Foto: Úkimettiń baspasóz qyzmeti
Syrtqy ister mınıstrliginiń málimetinshe, qazirgi ýaqytta Qazaqstanda Qytaı kapıtalynyń qatysýymen 50 myńǵa jýyq jumys orny ashylyp, jalpy somasy $66,4 mlrd bolatyn 224 ındýstrııalyq joba júzege asyrylyp jatyr. QHR Qazaqstan ekonomıkasyndaǵy iri bes ınvestordyń qataryna kiredi – 2005 jyldan beri tartylǵan ınvestısııa kólemi $26,4 mlrd-ty quraǵan.
Keńes barysynda Premer-mınıstr Sı Szınpınniń Qazaqstanǵa jasaǵan sapary eki el arasyndaǵy ekonomıkalyq seriktestikti jańa deńgeıge kótergenin atap ótti. Atap aıtqanda, Astanada ótken «Ortalyq Azııa – Qytaı» forýmynyń sheńberinde $24 mlrd-qa jýyq 58 kommersııalyq kelisimge qol qoıyldy.
«Memleket basshysy 2029 jylǵa deıin keminde $150 mlrd kóleminde sheteldik ınvestısııa tartý mindetin qoıdy. Osy turǵyda jetekshi ekonomıkalyq derjavalardyń biri jáne bizdiń negizgi ınvestısııalyq seriktesimiz Qytaı elimen tolyqqandy kooperasııany odan ári tereńdetý – Qazaqstannyń asa mańyzdy basymdyǵy. Sondyqtan ınvestısııalar kólemin arttyrý, jańa birlesken jobalardy iske qosý, ásirese shıkizattyq emes ári eksportqa baǵdarlanǵan ónimderdi óndirý boıynsha júıeli sharalar qajet. Memleket basshysynyń shaqyrýy boıynsha QHR Tóraǵasynyń Qazaqstanǵa taıaýda jasaǵan kezekti sapary eki el arasyndaǵy ekonomıkalyq áriptestiktiń joǵary deńgeıin dáleldep, odan ári nyǵaıta tústi. Árbir jobanyń júzege asyrylýy meniń tikeleı baqylaýymda bolady, tolyq qoldaý kórsetiledi», dedi Oljas Bektenov.
Úkimet basshysy jańa jobalar áli qolǵa alynbaǵan óńirlerge, onyyń ishinde Abaı, Shyǵys Qazaqstan jáne Batys Qazaqstan oblystaryna jumysty jandandyrý qajettigin atap ótti. Tıisti óńir basshylaryna qytaılyq seriktestermen ózara is-qımyldy kúsheıtip, naqty usynystar ázirleý tapsyryldy.
Sonymen qatar, aımaqtardyń Qytaı provınsııalarymen baılanysyn keńeıtý úshin óńirlik delegasııalardyń saparlaryn belsendi júrgizý qajettigine nazar aýdaryldy. Astana, Almaty, Qyzylorda jáne Túrkistan oblystarynyń bastamalary men qol jetkizgen nátıjeleri ózge óńirlerge úlgi retinde kórsetildi.
Mysaly, Almaty oblysynda «jasyl» energetıka, logıstıka, agroónerkásip jáne ónerkásip salalarynda jalpy quny $6 mlrd-tan asatyn jeti kelisimge qol qoıylǵan. Al Astana qalasy, Qyzylorda jáne Túrkistan oblystary ınfraqurylym, agroónerkásip jáne ónerkásip salalarynda bastamalar usynǵan.
Keńes qorytyndysy boıynsha Premer-mınıstr memlekettik jáne jergilikti atqarýshy organdarǵa qol qoıylǵan kelisimderdi is júzinde júzege asyrýdy, barlyq jobalar boıynsha júıeli súıemeldeý men úılestirýdi qamtamasyz etýdi tapsyrdy.
