Turning Points – álemniń túrli elderindegi tanymal oıshyldar men bedeldi sarapshylardyń búgingi zamannyń betalysy men erteńgi kúnniń baǵytyna qatysty pikir-tolǵamdaryn usynatyn jyl saıynǵy arnaıy basylym. Bıznes, tehnologııa, qoǵam, bilim jáne ekologııa taqyryptaryn qamtıtyn bul joba jahandyq trendterdi saralap qana qoımaı, olardyń óńirlik kórinisterine de úńiledi.
Elimizde basylymdy jaryqqa shyǵarý týraly uzaqmerzimdi lısenzııalyq kelisimge KAZMEDIA HOLDING kompanııasy qol qoıyp otyr. Kompanııanyń bas dırektory Erkin Jaqypov bul áriptestikti elimiz úshin jańa medıamádenıettiń bastaýy dep baǵalaıdy.
«KAZMEDIA HOLDING osyndaı biregeı redaksııalyq platformany elimizge ákelgenin maqtan tutady. Bul áriptestik – qoǵamdyq pikir almasý mádenıetin jańa deńgeıge kóterýdi, qazaqtildi aýdıtorııany jahandyq talqyǵa tartýdy jáne jergilikti kózqaras pen pikirlerdi qamtı otyryp, Qazaqstandy halyqaralyq dıalogtyń bel ortasyna shyǵarýdy kózdeıtin mańyzdy qadam», dedi ol.
Jýrnaldyń alǵashqy sany 2025 jyldyń sońynda jaryq kóredi dep josparlanyp otyr. Alǵashqy shyǵarylymda 2026 jyly álemdik deńgeıde ózekti bolýǵa tıis trendterge sholý jasalyp, otandyq oqyrman nazaryna usynylmaq. Sonymen qatar, bul nómir bıznes, tehnologııa, bilim, kóshbasshylyq jáne ekologııa sııaqty baǵyttardy qamtıdy.
Atalǵan oqıǵany tanystyrý úshin Turning Points rýhyna saı arnaıy forým ótkizý josparlanyp otyr. Aýqymdy pikirtalas alańyna Qazaqstannan jáne shetelden jetekshi sarapshylar, jýrnalıster men medıa sarapshylar qatysady dep kútilýde.
New York Times Licensing Group jahandyq lısenzııalaý jáne baspa ınnovasııalary bóliminiń basshysy Maıkl Grınspon Qazaqstanmen áriptestikti joǵary baǵalaıtynyn jetkizdi:
«Turning Points jobasy aıasynda KAZMEDIA HOLDING-pen jumys isteý biz úshin qýanyshty jańalyq. Biz túrli marapatqa ıe bolǵan jýrnalıstıkamyzdy jańa aýdıtorııaǵa jetkizý múmkindikterin únemi izdeımiz. Bul seriktestik bizdiń jahandyq oqyrmandar bazamyzdy keńeıtýge jol ashady».
KAZMEDIA HOLDING buǵan deıin National Geographic jýrnalynyń qazaq tilindegi eksklıýzıvti nusqasyn jaryqqa shyǵarý arqyly ózin joǵary sapaly kontent usynýshy retinde tanytqan edi. Sonymen qatar, kompanııa 2025 jyly Harvard Business Publishing uıymymen kelisim jasap, Harvard ManageMentor sıfrlyq oqytý platformasyn Qazaqstan, О́zbekstan jáne Qyrǵyzstan naryǵyna engizýdi qolǵa aldy.
Al 170 jyldan astam tarıhy bar The New York Times – Pýlıtser syılyǵyn eń kóp ıelengen, táýelsiz jýrnalıstıkasy men tereń taldaýǵa negizdelgen saraptamalyq maqalalarymen tanylǵan, álemdegi eń yqpaldy basylymdardyń biri. Onyń Turning Points basylymy – qoǵamdaǵy eń ózekti suraqtarǵa jaýap izdeıtin, álemdik deńgeıdegi pikir kóshin qalyptastyratyn mańyzdy medıa alań.
Elimizdegi oqyrman úshin mundaı jobanyń ashylýy – tek jańa formattaǵy mazmunmen tanysý ǵana emes, óz kózqarasyn halyqaralyq deńgeıde tanytyp, pikir almasýǵa qatysýdyń da biregeı múmkindigi bolmaq.
