Bastapqy ınvestısııa – 170 mln dollar
«Zaýyt iske qosylǵaly beri oblystyń ekonomıkalyq áleýetin arttyryp, jańa jumys oryndarynyń ashylýyna múmkindik berdi. Munaıly óńirde sheteldiktermen birlesken myńnan astam kásiporyn jumys isteıdi. Mashına jasaý salasynda 150 iri, orta jáne shaǵyn bıznes nysany bar. Jańa jobalar birinshiden, «Teńiz» ken ornyndaǵy keleshek keńeıý jobasynyń aıaqtalýyna baılanysty bosaǵan jumysshylardy jumyspen qamtýǵa yqpal etedi. Ekinshiden, eksportqa baǵyttalǵan ónimder ósimine septigin tıgizedi. Úshinshiden, óńirdiń áleýmettik-ekonomıkalyq damýyna serpin beredi», deıdi oblys ákiminiń orynbasary Marat Mýrzıev.
Júk vagondaryn qurastyrý zaýytyn iske qosqan «Texol» kompanııalar tobynyń basshysy Shota Avhazavanyń aıtýynsha, jobaǵa bastapqyda 170 mln dollar kóleminde qarjy salynǵan. Igi bastama tolyq júzege asyrylǵan kezde ınvestısııa kólemi 160 mlrd teńgege jetýi múmkin.
300 adam jumyspen qamtylǵan
«Zaýyt bastapqyda jylyna 6 myń vagon qurastyrady. Júkteme kóbeıgen saıyn usta, dánekerleýshi, burǵylaýshy, toıtarýshy sekildi san túrli beıindegi mamandarǵa suranys kóbeıedi. Munda vagon men sısterna shyǵarý, jóndeý, tehnıkalyq qyzmet kórsetýge arnalǵan barlyq ınfraqurylymdy qamtıtyn klaster qurý kózdelip otyr. Vagon qurastyrýǵa nemis stanoktary men elimizde óndirilgen materıaldar qoldanylady. Vagondardy Eýropa jáne Baltyq teńizi jaǵalaýyndaǵy elderge eksporttaý múmkindigi bar», deıdi Sh.Avhazava.
Qazir jańa úlgiler óndiriske engizilip jatyr. Sonyń qatarynda 25 myń arba men 136741 úlgisindegi artıkýlıasııalanǵan fıtıng platformasynyń modeli de bar. Sondaı-aq munda suıytylǵan kómirsýtekti gazdy tasymaldaıtyn sısternalar shyǵarylady. Zaýytqa vagon qurastyrý úshin metall konstrýksııalary Qaraǵandy oblysynan, moıyntirekter Stepnogordan, dońǵalaqty juptarǵa arnalǵan dıskiler men oster Ekibastuzdan alynady. Qazir zaýytta 300 adam turaqty jumyspen qamtylǵan. Jyl sońyna deıin olardyń qatary 600 mamanmen tolyǵady.
Bolattan quıylatyn bólshekter
Jaqynda qytaılyq «Hubei Provincial Mechanical and Electrical Institute GROUP Co., LTD.» ınjırıngilik holdıngimen kelisim jasaǵan. Taraptar temirjol vagonyna arnalǵan usaq jáne ortasha quıma bolat bólshekterin shyǵaratyn zaýyt qurylysyn jobalaýdy bastaǵaly otyr. Qytaılyq kompanııa jyl sońyna deıin jańa zaýyttyń jobasyn usynady. Qazir óndiris orny úshin bólingen jer teliminde qosalqy jáne keńse ǵımarattarynyń qurylysy bastaldy. Kirme jol salynyp jatyr. Birneshe óndiristik sehtan quralatyn zaýyt qurylysy jyl sońynda qolǵa alynbaq.
«Jańa óndiris orny 2027 jyldyń I toqsanynda iske qosylady. Zaýyt jylyna 30 myń tonnaǵa deıin quıma bólshek, vagon qurastyrýǵa qajetti tirek, ókshelik, tartqysh, býksa korpýsy syndy negizgi bólshekter shyǵarady. О́ndiriske negizgi shıkizat retinde jergilikti materıaldar qoldanylady. Bul – metall synyqtary men ferroqosymshalar», dedi Sh.Avhazava.
Atyraý oblysynyń ákimi Serik Shápkenovtiń pikirinshe, quıma bólshekter shyǵaratyn zaýyt – munaıly óńir ekonomıkasyn ártaraptandyrýǵa jol ashatyn mańyzdy jobanyń biri. О́ıtkeni Atyraý tek munaı-gaz ónerkásibi emes, logıstıka ortalyǵyna da aınala bastady.
Atyraý oblysy
