Sýretti túsirgen – Erlan OMAR, «EQ»
Jyldar ótken saıyn deńgeıi men aýqymy artyp kele jatqan, bıyl 14-márte ótkizilip otyrǵan týrnırde elge esimi eleýli el aǵalary – kórnekti jazýshylar Tólen Ábdik pen Qoıshyǵara Salǵarauly, Oqý-aǵartý mınıstri Ǵanı Beısembaev pen senator Nurtóre Júsip tuǵyrly tulǵa týraly estelikterimen bólisti.
Is-sharanyń ashylý saltanatynda Oqý-aǵartý mınıstri Ǵanı Beısembaev mınıstrlik Eýrazııa ulttyq ýnıversıtetimen birlese Aqańnyń artynda qaldyrǵan muralaryn zerttep-zerdeleýge baılanysty jumysty bastaǵanyn, Aqańnyń ánderi men shyǵarmalary, jýrnalıstıkadaǵy eńbekterine ǵylymı zertteý jumystaryn júrgizip, respýblıkalyq baıqaý ótkizýdi josparlap otyrǵandaryn súıinshiledi.
Al Parlament Senatynyń depýtaty Nurtóre Júsip: «Ǵalymnyń haty ólmeıdi, jaqsynyń aty ólmeıdi» degen qazaqta maqal bar. Búgingi doda sony aıǵaqtaıdy. Bul týrnırdi jýrnalıster bas qosyp qana qoımaı, eldiń erteńine qatysty oı-pikir almasyp, salaǵa qatysty máselelerdi talqylap, oınaı júrip oılasatyn jıyn dep aıtýǵa bolady», dedi óz sózinde.
EUÝ janyndaǵy Jýrnalıstıka máselelerin zertteý ınstıtýtynyń dırektory Qaırat Saq kezekti tastaıaqshylar saıysynyń sharttarymen tanystyrdy.
«Bıylǵy erekshelik jastar men aqsaqaldarymyz bólip-jarmaı bir ústeldiń basynda áńgimelerin aıta júrip oınasyn dep, jarysty birge ótkizip otyrmyz. Tek aqsaqaldarymyzda renish bolmaýy úshin ol kisilerge jeńildik jasadyq. 40 jasqa deıingiler 40–60 jastaǵylarǵa bir shar, al 60 jastan asqandarǵa 2 shar jeńildik beredi dep sheshtik», dedi jıyn basynda.
Osylaı jýrnalıstıkanyń jolbasshylary men qalamgerler, medıamenedjerler men jas jýrnalıster jarys kórigin qyzdyrdy.
Týrnırdi uıymdastyrýshylar belgili qalamgerler atyndaǵy júldeler de taǵaıyndady. Oralhan Bókeı atyndaǵy júlde – Sádibek Túgelge; Káribaı Ahmetbekov atyndaǵy júlde – Kárimbek Qurmanalıevke; Aqseleý Seıdimbek atyndaǵy júlde – Nurtóre Júsipke; Serik Ábdiraıymuly atyndaǵy júlde – Darhan Myńbaıǵa; Qýanyshbaı Qurmanǵalıev atyndaǵy júlde Qoıshybaı Esentaevqa berildi. Odan bólek «Eń syıly bılıardshy» júldesin – Qoıshyǵara Salǵarauly, «Eń mádenıetti bılıardshy» júldesin – Tólen Ábdik, «Eń sheber bılıardshy» júldesin – Altynbek Nuhuly, «Eń mergen bılıardshy» júldesin – Álimjan Sabyrjanuly, «Eń shapshań bılıardshy» júldesin – Sharhan Qazyǵul, «Tehnıkasy myqty tastaıaqshy» júldesin – Marat Manasbaev, «Eshkimniń kóńilin jyqpaǵan bılıardshy» júldesin Qaırat Musaqulov aldy.
Týrnır qorytyndysynda belgili aıtysker aqyn, ALJIR murajaıynyń dırektory Dáýletkereı Kápuly I oryndy, jýrnalıst, Batys Qazaqstan oblysy ákimdiginiń apparat basshysy Nurdilda Oraz II oryndy, al aqyn Ularbek Nurǵalymuly III oryndy ıelendi.
Jalpy, tastaıaqshylar dodasyna qatysýshylar taǵylymǵa toly týrnırdi joǵary deńgeıde uıymdastyrǵan Eýrazııa ulttyq ýnıversıteti ujymyna alǵystaryn aıtyp tarqasty.
