Foto: Úkimettiń baspasóz qyzmeti
Bektenovtyń aıtýynsha, negizgi kapıtalǵa tartylǵan ınvestısııalar kólemi 18%-ǵa ulǵaıǵan. Sonymen qatar, ekinshi deńgeıli bankterdiń bızneske nesıe berý kólemi de artyp, ótken jylmen salystyrǵanda 16%-ǵa kóbeıgen.
Ekonomıkanyń negizgi qozǵaýshy salalary retinde qurylys (15%-dan astam), kólik jáne qoımalaý (23%), óńdeý ónerkásibi (6%) jáne saýda (shamamen 8%) ataldy.
«Bul qazirgi ýaqytta qarqyndy ósýdi qamtamasyz etetin negizgi salalar. Endigi basty mindetimiz – osy qarqyndar men kórsetkishterdi saqtaý jáne odan ári arttyrý», dedi Premer-mınıstr.
Onyń aıtýynsha, Úkimet damý bıýdjetin kúsheıtý jáne salyq reformasyn júrgizý arqyly ınfraqurylymdyq jobalardy qarjylandyrýdy ulǵaıtýdy kózdep otyr. Bul uzaqmerzimdi ári ornyqty ósimge jol ashýy tıis.
Sonymen qatar Premer-mınıstr Oljas Bektenov Parlament palatalarynyń birlesken otyrysynda naryq konıýnktýrasyn kórsetpeıtin baǵalardy retteýge baılanysty sala uzaq ýaqyt boıy ınvestısııa úshin tartymsyz bolyp kelgenin atap ótti. Erkin baǵaǵa kóshkennen keıin jaǵdaı ózgerip jatyr.
«Salalar boıynsha JJM naryǵyn yryqtandyrý baǵytynda júrgizilip jatqan jumystar oń nátıje berýde. JJM baǵasy uzaq ýaqyt boıy rettelgendikten jáne naqty naryqtyq jaǵdaıdy is júzinde kórsetpegendikten, Úkimet baǵany yryqtandyrýǵa kóshti jáne biz bul jumys qazirdiń ózinde óz nátıjesin berip jatqanyn kórip otyrmyz. Investısııalar osy salaǵa qaıta bastady. Sebebi buryn sala ınvestısııa úshin tartymsyz bolatyn. Qazir jeke bıznes memlekettiń baǵany yryqtandyrýyn jáne atalǵan salanyń ınvestısııalyq tartymdylyǵy artyp kele jatqanyn kórip otyr», dedi Oljas Bektenov.
