Bıyl «Qazaqkonsert» uıymy 82 konsert, 3 iri shyǵarmashylyq joba jáne kóptegen memlekettik mańyzy bar is-sharalardy uıymdastyrǵan. Atap aıtqanda «Roza Baǵlanova» atyndaǵy halyqaralyq vokaldyq konkýrsy, «Serper» ulttyq óner konkýrsy jáne «Meniń Qazaqstanym» atty Shámshi Qaldaıaqov ánderiniń halyqaralyq festıvali júzege asyryldy.
Sonymen qatar, uıymnyń ártisteri Fransııa, Ulybrıtanııa, Italııa, Kanada, Túrkııa, Ispanııa, Chehııa, Bolgarııa, Belarýs, Majarstan, BAÁ,Tájikstan, Reseı Federasııasy, Túrkimenstan, Grýzııa, Armenııa, Latvııa jáne Ázerbaıjan sekildi 22 shet memleketke gastroldik saparmen baryp, qazaq ónerin álem sahnalarynda pash etti. Oǵan qosa Qostanaı, Aqmola, Shyǵys Qazaqstan, Ulytaý, Qyzylorda, Túrkistan, Jambyl, Jetisý jáne Almaty oblysyn qamtyǵan 17 respýblıkalyq gastroldik sapar barysynda elimizdiń túkpir-túkpirinde ulttyq mádenıetti keńinen dáriptedi.
Qazaqkonsert ártisteri men shyǵarmashylyq ujymdary «Qazaqstannyń halyq ártisi», «Qazaqstannyń eńbek sińirgen qaıratkeri», «Eren eńbegi úshin», «Barys» ordeni syndy 12 memlekettik marapatqa ıe boldy. Buǵan qosa «Qazaqstan halqy assambleıasyna 30 jyl» tósbelgisimen, «Dala dauysy» jáne Amerıka, Reseı, Grýzııa memleketinde ótken 7 respýblıkalyq jáne halyqaralyq baıqaýlarda júldeli oryndardy qanjyǵalady.
Qorytyndy kesh Astanadaǵy Amfıteatrda ótti. Bul keshte otandyq estrada juldyzdary, tanymal sahna sheberleri men jas talanttar bas qosyp, ashyq aspan astynda keń kólemdi mýzykalyq shoý usyndy.
Konserttik baǵdarlamada tanymal kompozısııalar, zamanaýı aranjırovkalar, orkestrlik súıemeldeý jáne ashyq aspan astyndaǵy merekelik atmosfera usynyldy. El esinde saqtalǵan súıikti ánder jańasha árlenip, jandy oryndaýda kórermenge jol tartty. Olardyń qatarynda «Sálem saǵan, týǵan el», «Jan dosym», «Aq darıǵa», «Qazaq eli», «Jelsiz túnde jaryq aı», «Ahaý kerim» syndy halyq júreginen oryn alǵan týyndylar bar.
Is-sharaǵa «Qazaqkonserttiń» tanymal solısteri men shyǵarmashylyq ujymdary qatysty: Qazaqstannyń halyq ártisi Maqpal Júnisova, Qazaqstannyń eńbek sińirgen ártisi Nurlan О́nerbaev, Qazaqstannyń eńbek sińirgen qaıratkerleri Súleımen Ibragımov, Qurmash Mahan, Klara Tólenbaeva, Gúlsim Myrzabekova, Azamat Jyltyrkózov, Bıbigúl Januzaq, «Eren eńbegi úshin» tósbelgisiniń ıegerleri Altynshash Muqataeva, Anna Ývarova, «Mádenıet salasynyń úzdigi» tósbelgisiniń ıegeri Perızat Turar, «Daryn» memlekettik jastar syılyǵynyń laýreaty Azat Málik, halyqaralyq jáne respýblıkalyq baıqaýlardyń laýreattary Darııa Bekpembet, Aıaýlym Qamajan, Dıdar Abdýhalyk, Aqbópe Álibekova, Asylhan Shalqarov, Erbol Tájibaev, Nursultan Anýarbek, Nursezim Samatqyzy sondaı-aq, Qazaq memlekettik sımfonııalyq orkestri, «Gúlder» jáne «Birlik» ansamblderi, «TURAN» etno-folklorlyq ansambli, «SAZ&SOUL» toby jáne «Astana Musical» memlekettik teatry.
