Negizgi kezdesýlerdiń biri «Citigroup» kompanııasynyń basqarýshy dırektory, egemendik konsaltıng departamentiniń jahandyq teńtóraǵasy Hanan Amın-Salemmen ótti. Kelissózder barysynda strategııalyq ınfraqurylymdyq jobalardy qarjylandyrý, Qazaqstannyń qarjy qyzmetterin jańǵyrtý, fınteh salasyndaǵy yntymaqtastyq jáne kapıtal naryqtaryn damytý máseleleri talqylandy. Sonymen qatar 2024 jylǵy qazan aıynda ótken alǵashqy «Kazakhstan Finance Day» forýmyn uıymdastyrýǵa «Citigroup» tarapynan kórsetilgen qoldaý erekshe atalyp ótti. Atalǵan forým Qazaqstanǵa ınvestısııalar tartýǵa jáne ekonomıkalyq baılanystardy nyǵaıtýǵa baǵyttalǵan.
Aýyl sharýashylyǵy ónimderin óńdeýdegi álemdik kóshbasshylardyń biri «Archer Daniels Midland» ókilderimen kezdesýde agro azyq-túlik ónimderiniń ornyqty jetkizý tizbekterin damytý máseleleri qarastyryldy.
«Pfizer» kompanııasynyń damýshy naryqtar jónindegi prezıdenti Sınan Atlıgpen Qazaqstan aýmaǵynda dárilik zattardy, vaksınalardy jáne kompanııanyń basqa da ónimderin óndirý perspektıvalary qaraldy.
«Think Equity» kompanııasynyń halyqaralyq yntymaqtastyq basshysy Karım Rammal Qazaqstannyń qarqyndy damyp kele jatqan qarjy naryǵyna jáne Qazaqstan qor bırjasymen (KASE) ózara is-qımyl áleýetine qyzyǵýshylyq bildirdi.
«Global New York Chamber of Commerce» prezıdenti Samat О́mirzaqovpen kezdesý barysynda Qazaqstannyń tamaq ónerkásibi ónimderiniń AQSh-qa tikeleı eksportyn keńeıtý, sondaı-aq amerıkalyq naryqta qazaqstandyq bıznesti qoldaýdy júıeleý máseleleri talqylandy.
«The Henry Jackson Society» taldaýshysy Darren Shpınkpen ótkizilgen kelissózderde Orta dálizdiń áleýetin ilgeriletý jáne Qazaqstannyń Shyǵys pen Batysty baılanystyratyn negizgi logıstıkalyq hab retindegi rólin nyǵaıtýǵa baǵyttalǵan mýltımodaldy kólik baılanystaryn damytý máseleleri kóterildi.
Sondaı-aq «Dakia U-Ventures» ókili Djonatan Edvard Chaý jáne «Grammy Philadelphia» atqarýshy dırektory Ramon Djoýnspen kezdesý barysynda kreatıvti jáne mýzykalyq ındýstrııa salasyndaǵy jobalardy júzege asyrý perspektıvalary talqylandy.
Jalpy alǵanda, bul sapar qarjy, ónerkásip, logıstıka jáne densaýlyq saqtaý salalaryndaǵy birlesken jobalarǵa joǵary qyzyǵýshylyqty rastaı otyryp, Qazaqstannyń AQSh-tyń jetekshi kompanııalarymen jáne saraptamalyq toptarymen iskerlik baılanystaryn nyǵaıtýǵa yqpal etti.
