Bir aptaǵa dúbirli doda Astanadaǵy Jaqsylyq Úshkempirov atyndaǵy Jekpe-jek saraıynda túńligin túredi. Bul – elimizdegi eń iri sport keshenderiniń biri jáne tolyqtaı múmkindigi shekteýli sportshylarǵa beıimdelgen nysan.
Halyqaralyq bochcha federasııasynyń (BISFed) aıasynda ótetin jahandyq doda 2028 jyly Los-Andjeleste jalaýy jelbireıtin Paralımpıada oıyndaryna irikteý ári reıtıngtik upaılar jınaýǵa zor múmkindik bermek. Álemdik týrnırdiń bizde ótkizilýi – elimizdiń dúnıejúzilik dodalardy uıymdastyrýdaǵy jetistigi men tájirıbesin áıgileı tússe kerek.
«Týrnırdiń Astanada ótkizilýi Qazaqstannyń paralımpıadalyq qozǵalystaǵy belsendi qatysýshy retindegi pozısııasyn nyǵaıtyp, eldiń barshaǵa teń múmkindik jasaýǵa degen umtylysyn aıqyndaıdy. Bul tek mańyzdy sporttyq shara ǵana emes, sondaı-aq tájirıbe almasýǵa, halyqaralyq yntymaqtastyqty damytýǵa sondaı-aq ınklıýzıvti sport túrlerin tanymal etýge de serpin bermek. Qazirgi ýaqytta týrnırge Eýropa, Azııa jáne Taıaý Shyǵys elderin qosa alǵanda, 14 memleket qatysatynyn rastady. Sportshylar jeke, juptyq jáne komandalyq saıysta baǵyn synaıdy», dedi Qazaqstan bochcha federasııasynyń vıse-prezıdenti Nazym Janǵazy.
Qazaqstan bochcha federasııasy 2021 jyly qurylǵan sátten jumysy jandanyp keledi. Federasııanyń 10 óńirde fılıaldary ashylyp, 250-den astam bala men eresek turaqty túrde jattyǵýǵa qatysady. Bochcha jattyǵýlary Qazaqstannyń 20 qalasynda turaqty ótedi.
Elimizde bochcha sporty alǵash ret 2018 jyly erekshe qajettilikteri bar balalardyń ata-analary uıymdastyrǵan seksııa esebinde qolǵa alyndy. 2021 jyly Qazaqstan bochcha federasııasy quryldy, al 2023 jyly Halyqaralyq bochcha federasııasynyń (BISFed) resmı múshesi atandy.
«Qazaqstan ulttyq quramasy 2022 jyldan beri iri halyqaralyq jarystarǵa qatysyp keledi. Osy ýaqyt ishinde sportshylarymyz ártúrli dárejedegi medaldarǵa ıe boldy. Qazaqstan quramasy BISFed reıtınginde 50-den astam el arasynda 18-orynda tur. Biz AQSh, Ispanııa sııaqty aldyńǵy qatarly quramalardan da joǵarymyz. Al Ortalyq Azııada absolıýtti kóshbasshyǵa aınaldy. Sońǵy úsh jylda 12 sport sheberi shyqty», deıdi Qazaqstan bochcha federasııasynyń sport dırektory Dııar Seıtov.
Halyqaralyq yntymaqtastyqtyń qarqyndy damyp, byltyr Ulybrıtanııa, Úndistan, Taıland jáne Ońtústik Koreıadan kelgen sarapshylardyń qatysýymen halyqaralyq bapkerler men tóreshilerge arnalǵan kýrstar ótkizildi. Bıyl da ıgi is jalǵasyn tapty. 15-ten astam jattyqtyrýshy men 20 tóreshi daıyndyqtan ótip, sertıfıkat aldy. Osy jyly Qazaqstan quramasy birneshe halyqaralyq oqý-jattyǵý jıyndaryna shaqyrtý aldy.
Bochcha — tirek-qımyl apparaty zaqymdanǵan adamdarǵa arnalǵan dáldikke negizdelgen sporttyq oıyn. Ol boýlıng, petank nemese boýlzǵa uqsaıdy. Oıyn maqsaty — túrli-tústi sharlardy aq sharǵa (djek) barynsha jaqyn ornalastyrý. Jeńimpaz — qarsylasqa qaraǵanda óz sharlaryn djekke jaqyn tastaǵan oıynshy, jup nemese komanda.
Bul sportta kúsh nemese jyldamdyqtan góri dáldik, strategııa jáne baqylaý mańyzdy. Bir oıyn 30–60 mınýtqa deıin sozylady, keıde jeńis mıllımetrlermen sheshiledi. 1984 jyldan bastap Paralımpıada oıyndarynyń baǵdarlamasyna engen.
Qazaqstan quramasy quramynda 10 sportshy bar. Onyń ishinde úsheýi BC3 klasyna jatady — olarda qozǵalys shekteýleri óte aýyr, sondyqtan olar dopty ózderi qozǵaı almaıdy. Osy sebepti olar arnaıy rampa arqyly oıyn órisine dopty baǵyttaıdy jáne rampa-operatormen birge jarys alańyna shyǵady.
Elimizdiń bochcha quramasy Hanchjoýda ótken Azııa Paralımpıada oıyndarynda komandalyq jarysta 8-oryn aldy. Byltyr Bahreındegi irikteý chellendjerinde komandalyq jarysta 3-oryn ıelendi. Almat Erhat — Bahreınde ótken álemdik chellendjerde kúmis, irikteý chellendjerinde qola júldeger atandy.
Bıylǵy qyrkúıekte Ońtústik Koreıada ótetin Álem kýbogyna bizdiń qurama alǵashqy ret qatyspaq. Ulttyq quramany Dıana Moldahmetova jattyqtyrady.
