Elimizde geologııa jáne jer qoınaýyn paıdalaný salasynda sıfrlyq transformasııa jalǵasyp jatyr.
– Jasandy ıntellekt kómegimen jyl sońyna deıin geologııalyq esepterdi óńdeý jáne geologııalyq zerdeleý bazasyn qalyptastyrý boıynsha túrli jobalardy iske asyrý josparda bar. Jasandy ıntellekt skanerlengen qujatty, esepti, keste men kartany tanıdy. Barlyq málimet bazaǵa júktelip, «Big Data» qalyptastyrady. «Big Data» bolashaqta ken oryndaryn tabý yqtımaldylyǵyn boljaý men baǵalaýǵa arnalǵan derekterdi óńdeýdi avtomattandyrady, – dedi Jánnat Dúbirova Ortalyq kommýnıkasııalar qyzmeti alańynda ótken baspasóz máslıhatynda.
Vıse-mınıstrdiń aıtýynsha, biryńǵaı platformada memlekettik qyzmetten bólek, esepti onlaın tapsyrý fýnksııasy da qoljetimdi. Búginde geologııa jáne jer qoınaýyn paıdalaný salasyndaǵy 22 memlekettik qyzmet sıfrlandyrylǵan.
– Bıyl jer qoınaýyn paıdalanýshylar alǵash sıfrlyq formatta esep tapsyrdy. Sonymen qatar qazir 3 449 kelisimshart pen lısenzııa, ákimdiktermen birlesip 2 024 kelisimshart pen lısenzııa sıfrlandyryldy. Budan bólek, endi qurylys barysyn baqylaýdy dron jáne jasandy ıntellekt júıeleri júzege asyrmaq. Dron belgilengen aýmaqty aınalyp ushyp shyǵady, al jasandy ıntellekt ushý nátıjesi bekitilgen jobalaý josparymen salystyryp tekseredi. Eger sáıkessizdik anyqtalsa, málimet memlekettik arhıtektýra-qurylys baqylaý komıtetine joldanady. Qurylys salasynda jasandy ıntellektini qoldanýǵa baǵyttalǵan qanatqaqty joba jyl sońyna deıin iske qosylady, – dedi Jánnat Dúbirova.
Sonymen qatar jyl sońyna deıin elimizde kommýnaldyq qyzmet boıynsha biryńǵaı tólem qujatyn aýyldarda qoldaný josparlanyp otyr. Bul kommýnaldyq tólemder boıynsha aqparattyq teńgerimsizdikti joıyp, biryńǵaı esep júrgizý standartyn qalyptastyrýǵa múmkindik beredi.
Bul bastamalardyń barlyǵy – memlekettik basqarýdyń ashyqtyǵyn, tıimdiligin jáne ornyqtylyǵyn arttyrýǵa baǵyttalǵan júıeli ózgeristerdiń bir bóligi. Sıfrlyq tehnologııalardy engizý arqyly salalardaǵy derekterdiń dáldigi artyp, sheshim qabyldaý úderisi jedel bolmaq. Sonymen birge ınvestısııa tartý, ınnovasııalyq orta qalyptastyrý jáne azamattardyń ómir sapasyn jaqsartý syndy maqsattarǵa qol jetkizýge jol ashylady. Demek jasandy ıntellekt pen sıfrlyq sheshimderdiń úılesimi elimizdiń ındýstrııalyq jáne qurylys salalaryn jańa damý deńgeıine kótermek.
