Turǵyndardyń aıtýynsha, ortalyqtandyrylǵan sý júıesi bolǵanymen, onyń tehnıkalyq jaǵdaıy óte nashar. Qubyrdaǵy sý qysymy tym álsiz, al keıbir kóshelerge múlde jetpeıdi. Turǵyndar sýdy túnde ydystarǵa jınap, kún tártibin soǵan beıimdeýge májbúr. Másele tek onyń qoljetimsizdiginde ǵana emes, sapasyna da qatysty. Qoǵam belsendisi Raýshan Jumataeva kóptegen jekemenshik uńǵyma óz betimen, sanıtarlyq normalardy saqtamaı qazylǵanyn aıtty.
«AMANAT» partııasy fraksııasynyń múshesi Maksım Rojın bul másele alǵash ret bir jarym jyl buryn Qaskeleńdegi qoǵamdyq qabyldaýda kóterilgenin atap ótti. Ol kezde 20-dan astam másele tirkelip, olardyń basym bóligi sheshilgen. Alaıda qazir eń ózekti aýyzsý máselesi qalyp otyr.
«Qazir aýylda 4500-den astam úı ortalyq sý júıesine qosylmaǵan. Turǵyndar ártúrli tarıfpen, sapasy kúmán týdyratyn jeke uńǵymalardan sý tutynyp otyr. Qajetti qujattar men jer telimi daıyn. Endi basty maqsat – respýblıkalyq bıýdjetten qarjy tartý. Bul másele Úkimet qaraýyna usynyldy. Premer-mınıstr tarapynan baqylaýǵa alyndy. Bıýdjet naqtylanǵanda qarjy bólinýge tıis. Bul másele «AMANAT» partııasynyń tikeleı baqylaýynda. Partııanyń «Halyqpen birge!» saılaýaldy baǵdarlamasynda ınfraqurylymdy jańǵyrtý negizgi basymdyqtardyń biri retinde belgilengen», dedi M.Rojın.
Jobalyq-smetalyq qujattamaǵa sáıkes, uzyndyǵy 184,8 shaqyrym bolatyn sý qubyry, eki sý qoımasy, úsh nasos stansııasy, dızeldi generator men transformatorlyq qosalqy stansııa salý josparlanǵan. Qurylys aıaqtalǵannan keıin shamamen 20 myń adam taza aýyzsýǵa qol jetkizetin bolady.
Qarasaı aýdanynda osyndaı jobalar kezeń-kezeńimen júzege asyrylýda. Qazir Jańaturmys pen Qaratóbe aýyldarynda sý qubyry jelisi salynyp jatyr. Sondaı-aq Eltaı, Jarmuhambet, Shalqar jáne Qaırat aýyldarynda da qurylys jumystary bastalǵan. Bul jobalarǵa 1,7 mıllıard teńge bólingen.
