Memleket basshysy Qasym-Jomart Toqaevtyń tapsyrmasyna sáıkes, bul qarajat búkil el boıynsha áleýmettik mańyzy bar ınfraqurylym jobalaryn damytýǵa baǵyttalýda.
Qaraǵandy oblysynda qaıtarylǵan aktıvterdiń esebinen aýyldyq densaýlyq saqtaý salasy men turǵyn úı-kommýnaldyq sharýashylyq (TKSh) júıesin jańǵyrtýǵa basymdyq berilgen. Búginde óńirdiń jeti aýdanynda 51 nysannyń qurylysy júrgizilýde. Olardyń qatarynda jańa dárigerlik ambýlatorııalar, feldsherlik-akýsherlik pýnktter jáne medısınalyq beketter bar. Bul jobalar aýyl turǵyndaryna medısınalyq kómektiń qoljetimdiligin arttyryp, sapaly qyzmet alýǵa múmkindik beredi. Endi aýdandyq nemese oblystyq ortalyqtarǵa baryp, dáriger qabyldaýyna jazylýdyń qajettiligi azaıady. Atalǵan jobalardy júzege asyrý úshin arnaıy memlekettik qorǵa qaıtarylǵan qarajat esebinen Qaraǵandy oblysyna 5,9 mlrd teńge bólindi. Bul soma medısınalyq nysandardyń qurylysyn aıaqtaýǵa baǵyttaldy. Sonymen qatar, TKSh salasynda da mańyzdy jobalar qolǵa alynǵan. Atalǵan qor qarjysy esebinen oblys aýmaǵynda 11 ınfraqurylymdyq joba — sý qubyry men sý júıeleri jelileriniń qurylysy júrgizilýde. Bul jobalar bıylǵy jyly tolyq aıaqtalady dep josparlanýda.
Qaraǵandy oblysy
