10 shildege deıin jalǵasatyn doda «Qazaqstan» jeńil atletıkalyq sport kesheninde ótedi. Bedeldi qurlyq chempıonatyna О́zbekstan, Qytaı, Úndistan, Vetnam, Taıland, Ońtústik Koreıa, Kýveıt syndy elder úzdikterin ákelip otyr. Elimizdiń úmitin 36 sportshymyz arqalap shyqpaq.
17–20 jas aralyǵyndaǵy atletter aýyr atletıkanyń klassıkalyq jattyǵýlary – julqı jáne serpe kóterý túrinen baq synasady. Jeńimpazdar jekelegen jattyǵýlarda da, qos saıystyń jalpy qorytyndysymen de medal enshileıdi.
Buǵan deıin elimizde aýyr atletıkadan iri halyqaralyq jarysqa sońǵy ret 2014 jyly Almatyda ótti. 11 jyl buryn Alataý bókterinde álem chempıonaty jalaýyn jelbiretken edi. Uıymdastyrýshylar Astanadaǵy Azııa chempıonaty – elimizde aýyr atletıka damýdyń jańa kezeńine qadam basqanyn aıqyndaıdy deıdi. Ekinshiden, bul otandyq sporttaǵy júıeli ózgeristerdiń nátıjesi.
Azııa birinshiliginde 17 jasqa deıingi jasóspirimder ziltemir kóterse, 20 jasqa deıingi jastar arasyndaǵy saıys ta qyzyqqa toly bolmaq. El úmitin arqalaıtyn sańlaqtar arasynda jahandyq dodalarda olja salǵan oǵlandar da bar. Ulttyq quramanyń aǵa jattyqtyrýshysy Albert Hakımýlın atletter naýryz aıynan beri 6 oqý-jattyǵý jıynyna qatysqanyn aıtty.
– Qurama sapynda býyn almasý júrip, jastar da óz áleýetin synaýǵa múmkindik aldy. Byltyr Dohada ótken Azııa chempıonatyna qatysyp júlde alǵan, bıylǵy kóktemde Perýde jalaýy jelbiregen álem chempıonatynan medalmen oralǵan sportshylarǵa da úmit artamyz. Olardyń ishinde jastar arasynda álem chempıony Edige Emberdi, jasóspirimderdiń álemdik dodasynda altyn alǵan Erasyl Sáýlebekov syndy úzdikter bar. Bular altyn medal úshin aıanyp qalmaıdy, – dedi bapker.
Arýjan SAIаN
Astana
