foto: Debat Eli qoǵamdyq qorynyń baspasóz qyzmeti
Qazaqstandyq komandalardyń halyqaralyq arenada óner kórsetýine, tájirıbe jınaqtap, zamanaýı zııatkerlik jelige enýine negiz bolǵan – «Debat Eli» qoǵamdyq qory. Atalǵan qor WSDC Ltd. uıymynyń elimizdegi resmı seriktesi retinde 15 oqýshynyń AWSDC 2025 týrnırine qatysýyna jol ashty.
Basty maqsat — halyqaralyq ıntegrasııa men jastardyń kóshbasshylyq áleýetin damytý
Týrnırdiń bıylǵy taqyryby – «Agents of Impact» («Yqpal agentteri»). Bul — álemdik máselelerdi sheshýde jastardyń belsendi rólin kórsetýge baǵyttalǵan sımvoldyq uran. AWSDC pikirsaıystary WSDC halyqaralyq formatyna negizdelip ótkizildi. Týrnırge Azııanyń 10-nan asa elinen komandalar keldi.
Qazaqstan sapynda úsh komanda qatysty:
Negizgi ulttyq qurama – «Debat Eli» qoǵamdyq qorynyń qoldaýymen quryldy,
Nazarbaev Zııatkerlik mektebi,
High Tech Academy mektepteriniń táýelsiz quramalary.
Ulttyq quramanyń úzdikteri:
Alen Aýsenov – «El Úmiti Cup 2024» jeńimpazy, úzdik spıker;
Arına Lepehına – Almaty qalasynyń úzdik debateri;
Nuraı Keskinbaeva – 2025 jylǵy mekteptik chempıonattyń jeńimpazy.
Komandany halyqaralyq deńgeıdegi debatshy, el chempıony Aıgerim Aıbasova jattyqtyrdy.
Tájirıbe – bolashaq jeńisterdiń irgetasy
Qazaqstan quramasy toptyq kezeńde senimdi oıyn kórsetip, azdaǵan upaı aıyrmasymen pleı-offqa óte almady. Bul – alǵashqy qadamǵa qaramastan, joǵary dárejeli nátıje. Sonymen qatar, High Tech Academy ókili Sofı Kojıvnıkova «Úzdik jas spıker» atalymynda ekinshi oryn alyp, Mason Korea ýnıversıtetinen $6000 grant utyp aldy.
Týrnır fınalynda Malaızııa quramasy jeńiske jetti.
Qazaqstan úshin bul — jaı ǵana sapar emes, halyqaralyq deńgeıde jastardyń bedelin arttyratyn jáne bolashaq múmkindikterge jol ashatyn tarıhı bastama.
