Pavlodar oblysynyń ákimi Asaıyn Baıhanov Aqsý qalasyna baryp, daýyldan zardap shekken ǵımarattardy qalpyna keltirý jumystarymen tanysty. Ǵımarattardy qalpyna keltirý úshin 814,2 mln teńge qajet. Búgingi tańda 18 nysan qalpyna keltirilip, 30 nysanda jumystar jalǵasýda. О́ńir basshysy qajetti qarajatty bólý prosesin jyldamdatýdy jáne osy aptada máslıhattyń kezekten tys sessııasyn ótkizýdi tapsyrdy.
О́ńir basshysy Aqsý qalasynyń ákimi Bolatbek Sháripovtiń jumysyn synǵa aldy. Sebebi - tótenshe jaǵdaıdan keıingi alǵashqy kúnderde halyqqa aqparattyń jedel taratylmaýy. Asaıyn Baıhanovtyń aıtýynsha, turǵyndar qalpyna keltirý jumystarynyń barysynan habardar bolǵan joq, olarmen eshkim túsindirý jumystaryn júrgizgen joq.
- Mundaı sátte ýaqtyly aqparat, sondaı-aq naqty ári úılesimdi jumys jáne halyqpen keri baılanys óte mańyzdy. Turǵyndar atqarylyp jatqan jumystar men qabyldanyp jatqan sharalar týraly bilý qajet. Olar týyndaǵan máselelermen jalǵyz qalmaıtyndaryn túsinýi kerek. Sondyqtan men Aqsý qalasynyń ákimi Bolatbek Sháripovke, onyń orynbasary Erjan Salhanovqa, sondaı-aq Aqsý ákimdigi apparatynyń basshysyna sógis jarııalaımyn. Sizder qoıylǵan mindetterdi oryndaı almadyńyzdar jáne sizderge senip tapsyrylǵan qalanyń turǵyndarymen baılanys ornata almadyńyzdar,-dedi oblys basshysy.
Oblys ákiminiń baspasóz qyzmetinen habarlaǵandaı, oblystyq bıýdjette tótenshe jaǵdaı saldaryn joıýǵa 1 mlrd 824,9 mln teńge, Pavlodar, Aqsý, Ekibastuz qalalarynyń, sondaı-aq Baıanaýyl men Pavlodar aýdandarynyń bıýdjetterinde 752,9 mln teńge qarastyrylǵan.
