Halqymyzdyń baı murasyn, rýhanı qundylyqtaryn dáriptep, ulttyq ónerge degen súıispenshilikti arttyrýǵa baǵyttalǵan is-sharany ashqan mýzeı dırektorynyń mindetin atqarýshy Serjan Barahanuly ulttyq ónerimiz ulyqtalatyn dombyra kúniniń mán-mańyzyna toqtalyp, mýzeı qorynda saqtalǵan mýzykalyq aspaptardyń tarıhyna sholý jasady.
Belgili kúıshi, Qazaqstannyń Halyq ártisi Seken Turysbek jınalǵan qaýymdy merekemen quttyqtap, óziniń 30 jyl ustaǵan súıikti dombyrasyn mýzeı qoryna tabys etti.
- Janyma jaqyn aspabym edi. Búgin óz qolymmen, shyn peıilimmen mýzeı qoryna tabystap otyrmyn. Tarıhymyz ben mádenıetimizdiń ordasynan oryn alsyn, - deıdi Seken Turysbek.
Taǵylymdy sharada Almaty oblysy, Ile aýdanynyń ardagerler uıymynyń tóraǵasy, qoǵam qaıratkeri Ámze Áldıbekuly sóz alyp, jas urpaqtyń boıyna ulttyq qundylyqtardy darytýda dombyra kúniniń mańyzy erekshe ekenin atady.
Sondaı-aq, shara barysynda «Aqjaýyn» memlekettik kameralyq orkestri jáne Almaty oblysy, Ile aýdany, О́tegen batyr aýlynyń №1 balalar mýzyka mektebiniń «Serper» jáne «Jiger» dombyrashylar ansamblderi óner kórsetip, tyńdarmannyń qulaq quryshyn qandyrdy. Shara barysynda óner kórsetken talantty búldirshinder kúıshi, Qazaqstannyń Halyq ártisi Seken Turysbekten bata aldy.
Kórermen nazaryna mýzeı qorynda saqtalǵan halqymyzdyń rýhanı qazynasyn baıytqan kórnekti tulǵalarǵa tıesili dombyralar usynyldy. Olardyń qatarynda – halyq ánshisi, kompozıtor Jaıaý Musa, uly Abaıdyń jary Dilda Alshynbaıqyzy, án óneriniń sheberi Ámire Qashaýbaev, mýzyka zertteýshisi, kompozıtor jáne dırıjer Ahmet Jubanov, qazaq opera óneriniń negizin qalaýshylardyń biri Kúlásh Baıseıitova, akademık Qanysh Sátbaev, teatr óneriniń tarlany Elýbaı О́mirzaqov, sondaı-aq Juban Moldaǵalıev, Káýken Kenjetaev, Ábdilda Jangeldın, Qapan Qasymov jáne basqa da birtýar óner qaıratkerleriniń dombyralary bar.
Kórme aıasynda dombyra sheberleriniń sheberlik saǵattary ótip, ulttyq kıim úlgileri kópshilik nazaryna usynyldy.
