Joba «Damý úshin AKT-ny ilgeriletýde úkimetter men barlyq múddeli taraptardyń róli» (The role of governments and all stakeholders in the promotion of ICTs for development) sanatynda úzdik dep tanyldy.
Jeńimpazdar búgin Jenevada WSIS+20 High-Level Event aıasynda jarııalandy, bul shara Birikken Ulttar Uıymynyń basty bastamasy bolyp tabylatyn Aqparattyq qoǵam máseleleri jónindegi dúnıejúzilik joǵary deńgeıdegi kezdesýiniń (VVÝIO) 20 jyldyǵyna arnaldy.
Saltanatty rásimde Qazaqstanǵa erekshe nazar aýdaryldy: Qazaqstandyq komanda marapattaý sessııasyn ashty.
Marapatty Halyqaralyq elektr baılanysy odaǵynyń (HEO) Bas hatshysy Dorın Bogdan-Martın memleketter men halyqaralyq uıymdar ókilderiniń qatysýymen ózi tabystady.
Bul Qazaqstannyń WSIS Prizes baıqaýyndaǵy 2013 jyldan bergi alǵashqy jeńisi. 2025 jyly baıqaýǵa álemniń túrli elderinen shamamen 1000 joba qatysty.
«Bul jeńis – elimizdiń sıfrlyq damýynyń halyqaralyq deńgeıde moıyndalýy. Qazaqstan joǵary tehnologııalyq áleýetke ıe ekenin kórsetip, álemdik trendterdi qýyp qana qoımaı, mańyzdy sıfrlyq sheshimderdi usynyp, olardy jahandyq deńgeıde damytýǵa úles qosa alatynyn dáleldedi», – dep atap ótti QR Prezıdenti Is basqarmasy Injenerlik-tehnıkalyq ortalyǵynyń basshysy Dáýren Nuralıev.
«Ahýaldyq-taldamalyq kesheni”(ATK)– memlekettik sektordaǵy derekterdi taldaý, monıtorıng jasaý jáne jedel basqarý úshin ázirlengen ınnovasııalyq sıfrlyq platforma. Júıe eldiń barlyq óńirleri boıynsha 500-den astam áleýmettik-ekonomıkalyq damý kórsetkishterin qamtıdy jáne strategııalyq sheshimderdi naqty ýaqyt rejıminde qabyldaýǵa múmkindik beredi. ATK Qazaqstan Respýblıkasy Prezıdenti Ákimshiligi men QR Prezıdenti Is basqarmasynda qoldanylady.
