Qazir qalada 200-den astam jalpy bilim beretin mektep bar. Al lagerge balalar jergilikti bıýdjet esebinen tegin qatysady. Bıyl 26 mamyrdan bastap 9 maýsymǵa deıin bastaýysh synyp oqýshylary men áleýmettik osal toptaǵy balalar lagerde tegin tamaqpen qamtyldy. Endi maýsym aıynyń sońyna deıin lagerler tańerteńnen túske deıin jumys isteıdi. Bul kezeńde tegin tamaq qarastyrylmaǵan. Balalar ádettegideı mektep janyndaǵy lagerlerge tegin barady. Shilde aıynda mektepter jańa oqý jylyna daıyndyq júrgizip, jóndeý jumystaryna kirisedi. Keıin tamyz aıynda lagerler qaıta ashylyp, tańerteńnen túske deıin balalardy tegin qabyldaıdy. Sonymen qatar qala syrtyndaǵy lagerler de jaqsy jumys istep jatyr. Munymen qosa qosymsha bilim berý úıirmeleri de bar.
Bilim basqarmasy ókiliniń aıtýynsha, qazirgi tańda 19 memlekettik jáne 122 jekemenshik qosymsha bilim berý mekemesiniń jumysy jandana bastady. Onda 40 myńnan astam bala memleket esebinen qosymsha bilim alýyna múmkindik bar.
Almaty qalasy Bilim basqarmasy basshysynyń orynbasary Muhtar Tájibaevtyń aıtýynsha, IT-daǵdylardy damytýǵa, otbasylyq qundylyqtardy nyǵaıtýǵa jáne patrıottyq tárbıeni kúsheıtýge baǵyttalǵan taqyryptyq lagerler jumys istep jatyr. Memleket basshysynyń tapsyrmasymen «Adal azamat» birtutas tárbıe baǵdarlamasyna erekshe mán berilgen. Bıyl mektep janyndaǵy lagerlerdiń jumysy erekshe mazmundy ári qyzyqty ótip otyr. Munda ulttyq taǵamdar jasap, keste tigip, toqyma toqıdy. Ulttyq oıyndar oınap, ulttyq mýzykalyq aspaptardy úırenedi. Sondaı-aq baǵdarlamalaý men robottehnıkaǵa mashyqtanyp, sporttan túrli estafetalarǵa qatysady.
Qazirgi kezde №140 mektep janyndaǵy sporttyq baǵyttaǵy lagerde 5-6 synyp oqýshylary túrli sport oıynymen aınalysady. Munda balalar voleıbol, fýtbol, toǵyzqumalaq jáne basqa da ulttyq oıyndarǵa qatysady. Lager baǵdarlamasy teorııalyq bilimdi de ushtastyryp, balalardyń sporttyq tártibin nyǵaıtyp, komandalyq rýhyn qalyptastyrýǵa baǵyttalǵan.
№97 mektep janynan ashylǵan «Arman» lagerinde balalar sporttyq jáne shyǵarmashylyq is-sharalarǵa, ekskýrsııalar, zııatkerlik oıyndar men sheberlik sabaqtarǵa qatysyp jatyr.
Almaty qurylys-tehnıkalyq kolledji bazasynda «Jazda mamandyq tańdaıyq» baǵdarlamasy aıasynda joǵary synyp oqýshylary aǵash óńdeý isin, grafıkalyq dızaındy meńgerip, qural-saımandarmen jumys isteýdi, sondaı-aq «SketchUp» arqyly 3D-modeldeýdiń negizderin úırenýge mashyqtanyp jatyr. Bul baǵdarlama balalarǵa alǵashqy kásibı daǵdylardy meńgerýge múmkindik beredi.
Patrıottyq jáne mádenı tárbıeni jandandyrý maqsatynda №208 mektep janynan «Etno City» etnolageri jumysyn bastady. Munda balalar ulttyq salt-dástúrdi meńgerip, erekshe sánmen tigilgen kıiz úıde bilim alyp, arnaıy baǵdarlama aıasynda ulttyq qolóner boıynsha sheberlik sabaqtaryna qatysady. Balalar qazaqtyń áshekeı buıymdary men turmystyq zattar jasap úırenedi.
Naýryzbaı aýdanyndaǵy Oqýshylardyń ınnovasııalyq shyǵarmashylyǵy ortalyǵynda ashylǵan IT-lagerde 7-15 jasqa deıingi balalar baǵdarlamalaý negizderin meńgerip, elektronıkamen tanysyp, túrli ǵylymı tájirıbege qatysady. Munda balalar mýzykalyq dáristerge qatysyp, aspaptarda oınap, kıim tigýdi úırenedi.
Ata-analar qazirgi kezde qala mektepteri men kolledjderinde iske asa bastaǵan tartymdy bastamalardy ári qaraı jandandyrý qajet degen pikir aıtady. Balalary bastaýysh synypta oqıtyn Indıra Raqymbaı mektep janyndaǵy jazǵy lagerlerdiń baǵdarlamasyna ózgeris kerek deıdi. Jazǵy lagerge jumysbasty ata-analar aýlada bos sendelip júrmesin degen sebeppen balalaryn amalsyzdan jiberedi. О́ıtkeni kópshiligi balalar úshin qyzyqty emes. Eger lagerler baǵdarlamasy mazmundy, taǵamdary dámdi bolsa, qyzyǵyp baratyn balalar sany da kóbeıedi. Bul balalar qaýipsizdigin saqtaýǵa, bos ýaqytyn tıimdi paıdalanýǵa yqpal etedi. Bıyl jetkinshekterdiń mýzeılerge tegin barýy qarastyryldy. Aldaǵy ýaqytta teatrlarǵa barýy da tegin uıymdastyrylsa, bul otbasynda 2-den kóp balasy bar ata-analardy áleýmettik turǵydan qoldaýǵa yqpalyn tıgizeri sózsiz.
«Jazǵy lagerlerge jas mamandardy kóptep tartý qajet. О́ıtkeni jas mamandardyń kreatıvti ıdeıalary, sıfrlyq keńistikti qoldanýdaǵy bilimi men biligi balalardy qyzyqtyratyn is-sharalardy ótkizýge kóp septigi tıedi. Meni bıyl balalardyń anımasııalyq jáne kitapqa qyzyǵýshylyǵyn arttyrýǵa baǵyttalǵan baǵdarlamanyń bolmaǵany qynjyltty. Qalada kitap shyǵaratyn, kitap taratatyn baspalar, saýda úıleri barshylyq. Solarǵa oqýshylardyń ekskýrsııasyn uıymdastyryp, balaólar jazýshylarymen kezdesýler ótkizip, kitap syılaý aksııasy uıymdastyrylsa jazǵy lager baǵdarlamasyn qyzyqty ete túsetini sózsiz. Budan bólek, elimizdegi sport komandalary jattyǵýlaryna aparyp, oıyndaryn kórsetý, chempıondarmen, óner ókilderimen kezdesýler ótkizip, shaǵyn konsertterin uıymdastyrý, sheberhanalar jumysymen tanystyrý da balalardyń tanymyn keńeıtedi. Balmuzdaq shyǵaratyn, kondıterlik fabrıkalardyń jumysymen tanystyrý da tartymdy bolmaq. Qala mańyndaǵy qulpynaı, tańqýraı plantasııalary, sondaı-aq mal sharýashylyǵy fermalaryna demeýshiler tartý arqyly ekskýrsııalar jasaý jetkinshekterge qyzyqty ǵana emes, eńbekke baýlýdyń bir qadamyna aınalatyny sózsiz. Balalardy qorǵaıtyn, qamqorlyq jasap, qaýipsizdigin kúsheıtetin qoǵam quramyz desek, mektepten tys ýaqytyn tıimdi paıdalanatyn aýqymdy ári mazmundy baǵdarlamalardy jetildirý qajet», deıdi ol.
Gadjetke táýeldilikten arylý, sıfrlyq keńistikti saýatty paıdalanýda mektepter janyndaǵy jazǵy lagerler jumysyn jandandyrýdyń máni zor. Osy baǵytta ike asatyn baǵdarlamalar arnaıy mamandardyń, bıznes ókilderi úkimettik emes uıymdardyń, ata-analardyń qatysýymen oqý jyly bastalǵan sátten bastap ázirlenip bekitilgeni abzal. Balalardyń kúzgi, qysqy, jazǵy kanıkýlyn uıymdastyrý naýqandyq sıpat alyp, bilim men tárbıe berýdiń ajyramas bir bóligine aınalsa ıgi.
ALMATY
