Foto: Májilistiń Baspasóz qyzmeti
Halyq qalaýlylary aldymen «Ulttyq ındýstrııalyq munaı-hımııa tehnoparki» arnaıy ekonomıkalyq aımaǵyna baryp, aımaqtaǵy iri nysandardyń biri «Karabatan Utility Solutions» JShS-ge qarasty elektr stansııasynyń jumysyn kórdi. Qazirgi tańda qýattylyǵy 310 MVt bolatyn bul nysan KPI zaýytyn úzdiksiz energııamen qamtamasyz etip otyr. Aldaǵy ýaqytta stansııaǵa taǵy eki iri zaýyttyń qosylýy josparlanǵan.
«Búgin iske qosylǵanyna bes jyl bolǵan, arnaıy ekonomıkalyq aımaqty energııamen qamtıtyn qýatty elektr stansııasynyń jumysymen tanystyq. Sońǵy ýaqytta shaǵyn jáne orta kásip ıeleri de osy stansııadan qýat alýǵa ótinish bildire bastady. Osyǵan baılanysty qosalqy stansııa qurylysyn qarjylandyrý qajettiligi týyndap otyr. Qyrkúıekte Parlament sessııasy bastalǵan soń bul máselelerdi zańnamalyq deńgeıde kóterip, sheshý joldaryn qarastyramyz», dedi D.Turǵanov.
Alaıda, basqarma tóraǵasynyń orynbasary Rýslan Qalıev habarlaǵandaı, bastapqy joba shaǵyn jáne orta kásipkerlik nysandaryn elektr qýatymen qamtýdy qamtymaǵan. Qazirgi suranysty qamtamasyz etý úshin qýattylyǵy 165 MVt bolatyn jańa qosalqy stansııanyń tehnıkalyq-ekonomıkalyq negizdemesi ázirlenip, saraptamadan ótkizilgen. Jobaǵa qarjy bólinse, nysan 2028–2029 jyldary iske qosylady dep josparlanyp otyr.
Sapar barysynda depýtattar elektr qýatynyń jetispeýshiligi óńirlik kásipkerlik bastamalardyń júzege asýyna kedergi keltirip otyrǵanyn erekshe atap ótti.
Májilis depýtaty Ádil Jubanov ta bul baǵyttaǵy máselelerge nazar aýdardy. Onyń aıtýynsha, arnaıy ekonomıkalyq aımaqta gaz-hımııa salasyna qatysty jobalardy júzege asyrýǵa daıyn kásipkerler bar. Alaıda olardy toqtatyp turǵan basty faktor – ınfraqurylymnyń, sonyń ishinde elektr qýatynyń jetkiliksizdigi.
«Bul – biz úshin úlken syn. Energetıka mınıstrliginiń salǵyrttyǵy saldarynan osyndaı jaǵdaı qalyptasyp otyr dep esepteımin. Sebebi kúrdeli máseleni sheshý úshin asa kóp qarjy qajet emes. Máselen, qazirgi kezde munda 20 MVt qýatqa suranys bar. Bul shamamen 12 jobaǵa qatysty, al ony iske asyrý úshin nebári 1,1 mıllıard teńge qajet. Aımaqta bos jer jetkilikti. Alaıda qajetti ınfraqurylym bolmaǵandyqtan, ózge kásiporyndar kelýge qulyqsyz», dedi Á.Jubanov.
Depýtattar bul máseleni Parlamenttiń kún tártibine shyǵaryp, salalyq mınıstrlikpen birlesip sheshim qabyldaýǵa kúsh salatyndaryn jetkizdi.
