Komıtettiń pikirinshe, qatań aqsha-kredıt saıasatyn saqtaý – ınflıasııany turaqtandyrý men halyqtyń senimin arttyrýdyń basty quraly.
«Inflıasııanyń baıaýlaǵanyna qaramastan, ol áli de eki tańbaly deńgeıde qalyp otyr. Tarıfterdiń ósýi, tutynýshylyq suranystyń joǵary bolýy jáne jekelegen naryqtyq qyzmetterdiń qymbattaýy jalpy baǵaǵa qysym túsirýde. Osyǵan baılanysty biz bazalyq mólsherlemeni qazirgi deńgeıde saqtaý týraly sheshim qabyldadyq», dep túsindirdi Ulttyq bank.
2025 jylǵy maýsymda jyldyq ınflıasııa 11,8% boldy. Qyzmet kórsetý baǵasy 16,1%, al azyq-túlik baǵasy 10,6% ósken. Bul ósim, birinshi kezekte, ımporttyq taýarlardyń qymbattaýy, aýyl sharýashylyǵy ónimderiniń baǵasy, jáne retteletin qyzmetterdiń tarıfterimen baılanysty.
Inflıasııanyń aılyq kórsetkishi mamyrmen salystyrǵanda sál tómendep, 0,8% boldy. Alaıda bazalyq ınflıasııa – 0,9%, al maýsymdyq faktorlardy esepke almaǵanda – 1,0%.
«Bizdiń baǵalaýymyzsha, halyq tarapynan tutynýshylyq suranys áli de joǵary. Bul – jalaqy ósimimen, bólshek nesıeleýdiń qarqyndy damýymen jáne ınflıasııalyq kútýlerdiń áli de joǵary bolýymen baılanysty», dedi Ulttyq bank ókilderi.
Ulttyq bank derekterine súıensek, aldaǵy 12 aıǵa arnalǵan ınflıasııalyq kútýler tómendegen. Alaıda sarapshylar bul kórsetkishterdiń qubylmaly ári turaqsyz ekenin aıtady.
«Inflıasııalyq kútýlerdiń tómendeýi – oń belgi. Alaıda saýalnama nátıjelerinen halyqtyń baǵa ósimine degen alańdaýshylyǵy saqtalǵanyn kórip otyrmyz. Bul faktorlar aqsha-kredıt saıasatyna qysym týdyrýy múmkin», dedi Komıtet músheleri.
Naryqtaǵy kásibı qatysýshylar ınflıasııa 2025 jyly 10,7–11% arasynda bolady dep boljaıdy.
Syrtqy ınflıasııalyq qysym sál álsiregenimen, álemdik naryqtardaǵy qubylmalylyq saqtalyp otyr. Jetekshi elderdegi ınflıasııa báseńdegenimen, Ortalyq bankter saq ári baıypty saıasat júrgizýge májbúr.
«Qarjy naryqtaryndaǵy qubylmalylyq, geosaıası shıelenister men saýda qatynastaryndaǵy belgisizdik syrtqy qysymnyń tolyq joıylmaǵanyn kórsetip otyr. Osy rette munaı baǵasy bizdiń optımıstik ssenarııge jaqyn deńgeıde saqtalyp keledi», delingen resmı habarlamada.
Qańtar-mamyr aılarynda Qazaqstan ekonomıkasy 6% ósim kórsetti. Bul ósim negizinen kólik salasy (23,1%), qurylys (15,4%), saýda (7,8%) jáne ónerkásip sektoryndaǵy belsendilikpen baılanysty.
Tutynýshylyq kredıtteý 32,4% jyldyq ósimmen alǵa jyljyp otyr. Halyq arasyndaǵy bólshek nesıege suranystyń artýy, marketıngtik naýqandar men bólip tóleý tetiginiń keńinen qoldanylýy ishki suranysty arttyryp keledi.
«Qazirgi suranys deńgeıi óte joǵary. Bul – ekonomıkanyń jandanǵanyn kórsetkenimen, ınflıasııalyq qysymdy da kúsheıtetin faktor», deıdi Ulttyq bank.
Alda ne kútemiz? Ulttyq bank aldaǵy ýaqytta bazalyq mólsherlemeni ózgerissiz saqtaý nemese qajet bolǵan jaǵdaıda arttyrý nusqalaryn qarastyrady. Bul sheshimder makroekonomıkalyq boljamnyń jańa raýndyna baılanysty qabyldanady.
Kelesi josparly sheshim 2025 jylǵy 29 tamyzda jarııalanady.
