Foto: instagram.com/baurynasalu.film
2003 jyly negizi qalanǵan Ischia Film Festival – Eýropadaǵy eń kórkem jáne erekshe festıvalderdiń biri. Ol ortaǵasyrlyq Aragon saraıynyń aýmaǵynda ótedi.
Festıvaldiń basty ereksheligi – kınonyń kórneki ortasyna jáne túsirilim oryndarynyń kórkemdik róline nazar aýdarý. Sonyń arqasynda árbir fılm mádenı jáne tabıǵı keńistik kontekstinde qarastyrylady. «Baýyryna salý» fılmi «Úzdik tolyqmetrajdy fılm» nomınasııasy boıynsha jeńimpaz atandy. Fılm Qazaqstan Respýblıkasy Mádenıet jáne aqparat mınıstrliginiń jáne Ulttyq kınony qoldaý memlekettik ortalyǵynyń qoldaýymen túsirilgen bolatyn.
Buǵan deıin kartına Asia Pacific Screen Awards-taǵy eń úzdik jastar fılmi atandy, Ázerbaıjandaǵy Baku International Film Festival dodasynda da bas júldege ıe bolǵan. Fransııadaǵy Cinema Heritage Festival baıqaýynda arnaıy marapatqa ıelendi. Operator Janarbek Eleýbek Asia World Film Festival-da «Úzdik operator» nomınasııasy boıynsha top jardy. Sonymen qatar fılm resmı túrde Qazaqstannan «Shet tilindegi úzdik fılm» nomınasııasy boıynsha «Oskar-2025» syılyǵyna usynylǵan.
Fılmniń sıýjeti ejelgi qazaq dástúri boıynsha ájesiniń tárbıesinde bolǵan balanyń oqıǵasyn baıandaıdy. Ájesi ómirden ótken soń bala ata-anasyna oralyp, jańa ortada beıtanys adamdarmen qarym-qatynasy qıyndaýy tóńireginde órbeıdi.
