Almatylyqtar jańa baspanany «bólme ornyna bólme» qaǵıdaty boıynsha nemese burynǵy turǵyn úıiniń naryqtyq qunyna sáıkes ótemaqy alý arqyly ıelenip otyr. Jańartý baǵdarlamasy aıasynda barlyq páter tolyq árlenip, daıyn kúıinde berildi. Úılerge ınternet júrgizilip, órtke qarsy dabyl júıesi, santehnıka, faıans, gaz nemese elektr plıtasy ornatylǵan.
Sonymen bıyl eń turǵyny kóp Túrksib aýdanynda – 99 adam, Almaly aýdanynda – 57, Jetisý aýdanynda – 32, Áýezov aýdanynda – 20, Bostandyq aýdanynda – 7, Alataý aýdanynda – 3 jáne Medeý aýdanynda – 2 adam jańa páterge qonystandy.
Baǵdarlamaǵa sáıkes, kóshirý men ǵımarattardy súrý jumystary barlyq menshik ıeleriniń kelisimimen ǵana júrgiziledi. Erekshe kútimdi qajet etetin adamdar úshin birinshi qabattan nemese jedelsaty, pandýsy, kedergisiz qoljetimdiligi bar úılerden páter qarastyrylǵan. Qala turǵyndarynyń qaýipsizdigin qamtamasyz etý maqsatynda ásirese, qamysty úıler men tektonıkalyq jaryq aımaǵynda ornalasqan ǵımarattardy súrýge erekshe kóńil bólinedi.
Berilgen baspanaǵa kóshýden bas tartqan jaǵdaıda turǵyndar eski úıde tura beredi, biraq yqtımaldy qaýip-qaterlerge ózderi jaýapty bolady.
Bıyl jyl sońyna deıin «Qalalyq kúrdeli qurylys kásiporny» men ınvestorlardyń kúshimen taǵy 600-den astam adamdy jańa turǵyn úımen qamtamasyz etý josparlanyp otyr.
«Jańartý baǵdarlamasy keshendi tásilge negizdelgen. Turǵyn úı ǵana emes, sonymen birge qala turǵyndarynyń ómir salty ózgeredi: jaıly orta qalyptasyp, jańa qoǵamdyq keńistikter, jumys oryndary men qyzmetter paıda bolady. Sonymen qatar, Almatynyń sáýlettik kelbeti jańarady. 2030 jylǵa deıin qaladaǵy eski úılerdiń sanyn 1 366-dan 690-ǵa deıin azaıtyp, shamamen 7 500 menshik ıesin zamanaýı páterge kóshirý josparlanyp otyr», dedi «Qalalyq kúrdeli qurylys kásiporny» JShS basqarma tóraǵasy Rınat Qurmanov.
«Almatynyń turǵyn úıdi jańartý baǵdarlamasy – 2030» qalalyq ákimdik tarapynan ázirlenip, 2024 jyldyń qarasha aıynda máslıhat bekitken bolatyn. Baǵdarlamany «Almaty» ÁKK» AQ ákimshiligi men ýákiletti uıym Almaty qalasy ákimdiginiń «Qalalyq kúrdeli qurylys kásiporny» JShS júzege asyryp otyr.
