Osy jyldyń basynan beri tórt birdeı zamanaýı ótkizý beketi paıdalanýǵa berildi. Atap aıtqanda, Qytaımen shekarada – «Qaljat» pen «Alakól», al О́zbekstanmen shekarada – «Kaplanbek» pen «Atameken» ótkizý pýnktteri jańartylǵan. Jyl sońyna deıin taǵy bes beketti – «Qazyǵurt», «Tajen», «Temir baba», «Maıqapshaǵaı» jáne «Baqty» ótkizý beketterin jańǵyrtý aıaqtalady dep josparlanyp otyr.
Beketter halyqaralyq talaptarǵa saı jańa tehnologııalarmen jabdyqtalǵan. Kólikterdi skanerleý, avtomatty tekserý jáne ólsheý qurylǵylary tolyq ornatylǵan. Sonymen qatar, jańa úlgidegi baqylaý júıeleri júrgizýshilerdiń kólikten túspeı-aq baqylaýdan ótýine múmkindik beredi. Bul óz kezeginde shekaradan ótý ýaqytyn 30 mınýtqa deıin qysqartýǵa jol ashyp otyr.
О́tkizý beketteriniń jańa úlgisinde «bir tereze» qaǵıdasyna negizdelgen birizdi tehnologııalyq dáliz iske qosylǵan. Bul júıe barlyq baqylaý túrlerin qosymsha toqtaýsyz bir jerden ótkizýge múmkindik beredi.
Qarjy mınıstrligi beketterdi jańǵyrtýmen qatar, keden rásimderin avtomattandyrý men sıfrlandyrý baǵytynda da birqatar jumystar júrgizip jatyr. 2023 jyldan bastap Eýrazııalyq ekonomıkalyq odaqtyń syrtqy shekaralaryndaǵy barlyq avtokólik ótkizý beketterinde «CarGoRuqsat» elektrondy kezek júıesi engizildi. Bul kólik keptelisin azaıtyp, júk tasymaldaý úderisiniń ashyqtyǵy men tıimdiligin arttyrdy.
Búginde 76 bıznes-prosess ońtaılandyrylyp, kólik quraldarynyń ótkizý ýaqytyn úsh esege qysqartýǵa múmkindik berdi. Úsh avtohab pen bir kólik-logıstıkalyq ortalyq iske qosyldy. «Nur joly» ótkizý pýnkti táýlik boıy jumys rejımine aýystyrylyp, «Alakól» men «Maıqapshaǵaı» beketteriniń jumys ýaqyty ulǵaıtyldy.
2024 jyldan bastap «Keden» atty biryńǵaı sıfrlyq platforma kezeń-kezeńimen engizilýde. Onyń 20 modýliniń 13-i qazirdiń ózinde jumys istep tur. Elektrondy deklarasııalaý, formatty-logıkalyq baqylaý júıesi engizilip, «Qorǵas» halyqaralyq ortalyǵynda taýarlardy esepke alý tolyǵymen sıfrlandyryldy. Qyzmetterdiń biriktirilgen baqylaýy avtomattandyrylyp, tranzıt rásimderi jedeldetildi, kedendik qyzmettermen ózara árekettesý onlaın-formatqa kóshirildi.
Nátıjesinde 2022 jyly 640 myń kólik quraly ótkizilse, 2024 jyly bul kórsetkish 1,4 mıllıonǵa jetti. Jańǵyrtý jumystary elimizdiń shekaradaǵy ekonomıkalyq belsendiligin arttyryp, taýar aınalymynyń ashyqtyǵy men jyldamdyǵyn qamtamasyz etýge baǵyttalyp otyr.
