Spıkerdiń aıtýynsha, BEJ-diń qaýipsizdigi birinshi orynda tur. Qazirgi ýaqytta júıe aqparattyq qaýipsizdik turǵysynan jan-jaqty tekserilip jatyr. Bul jumys QR Ulttyq qaýipsizdik komıtetiniń tehnıkalyq qyzmeti men Sıfrlyq damý, ınnovasııalar jáne aeroǵarysh ónerkásibi mınıstrligimen birlesip júrgizedi. Júıe pılottyq rejımde iske qosylyp, onyń barlyq tetikteri naqty jaǵdaıda synaqtan ótip jatyr.
«Pılottyq jobada biz bárin synap kóremiz, kemshilikterdi eskeremiz. Bul ónerkásiptik paıdalanýǵa bergen kezde júıe aqaýsyz jumys isteýi úshin jasalýda», dedi Turǵanbaev.
Qazaqstan zańnamasyna sáıkes, BEJ serverleri elimizdiń ishinde ornalasady. Bul azamattardyń jeke derekteriniń syrtqa ketpeýin qamtamasyz etedi. Sonymen qatar, BEJ tek qajetti sátte ǵana memlekettik derekqorlarmen baılanys ornatady. Mysaly, eger paıdalanýshynyń JSN-i arqyly onyń boryshkerler tiziminde bar-joǵy tekserilse, júıe tek sol naqty JSN boıynsha ǵana suraý jiberedi.
Tirkeý kezinde paıdalanýshy JSN men telefon nómirin engizip, SMS-kod arqyly jeke basyn rastaıdy. Keıin ekinshi kezeń – bıometrııalyq sáıkestendirý júrgiziledi. Mundaı júıe bógde adamnyń atynan tirkelýdi boldyrmaıdy jáne eń aldymen kámeletke tolmaǵandardyń qumar oıyndarǵa qatysýyna tosqaýyl qoıýǵa baǵyttalǵan.
Ádilet Turǵanbaevtyń aıtýynsha, arnaıy qurylǵan memlekettik operator BEJ-diń qaýipsiz ári ádil jumysyn qamtamasyz etedi. Bul júıe oıyn bıznesine qatysýshylardyń derekterin qorǵap qana qoımaı, olardyń quqyqtaryn saqtaýǵa da baǵyttalǵan.
«Mysaly, biz adamnyń boryshkerler tiziminde bar-joǵyn teksergen kezde, búkil bazany – ıaǵnı 3-4 mıllıon adam týraly málimetti – júıemizge júktemeımiz. Bul – múlde múmkin emes. Júıe adamnyń JSN-in engizgende ǵana naqty suraý jiberedi. Iаǵnı, «bul adam bazada bar ma?» degen suraq joldaımyz. Eger «ıá» degen jaýap kelse – biz ol adamǵa akkaýnt ashýǵa ruqsat bermeımiz, ol bás tigýge quqyly bolmaıdy», dedi Ádilet Turǵanbaev.
