Aqmola oblysynda sý tasqynyna qarsy sharalar kúsheıtildi

KО́KShETAÝ. 19 naýryz. Aqmola óńirindegi ózenderde kóktemgi jaýyn-shashynǵa baılanysty sýdyń arnadan asyp, jaıylýy múmkindigi joqqa shyǵarylmaıdy. Bul týraly egemen.kz tilshisi habarlady. Kóktemgi sý tasqynyna baılanysty oblysta arnaıy shtabtar qurylyp, belgilengen is-sharalar jospardaǵy kestege saı atqarylýda. Oblystyq shtab tasqyn sýdyń boljamdyq kólemi, sý qoımalary men gıdrojúıelerdiń naqty jaǵdaıy týraly málimet bankin qalyptastyryp, apatty jaǵdaıǵa qarsy qımyldar keshenin, turǵyndardy jedel aqparattandyrý máselesin baqylaýda ustap otyr. Qazirgi tańda tótenshe jaǵdaılar departamenti atqarylǵan isterge turaqty monıtorıng jasap, eldi-mekenderdi qardan tazartý, sýaǵarlardyń, tehnıkalardyń daıyndyǵyn baqylaýda ustaýda. Arnaıy jattyǵýlar da dúrkin-dúrkin ótkizilýde. Atqarýshy organdar men kommýnaldyq qyzmet, aýyl sharýashylyǵy qurylymdary arasynda memorandýmdar men kelisim sharttar túzilgen. Qoldaǵy derekter boıynsha, eldi mekenderden 515 myń tekshe metr qar tazartyldy. Sondaı-aq, metr aryqtar men 7 900 metr aǵyn sýlar júıesi qalypqa keltirildi. Depratament qazirdiń ózinde 678 dana ınjenerlik, 160 dana sý tartqysh tehnıka men 136 júzý quraldarynyń iske kiriskendigi týraly aqpar taratty. Buǵan qosa, 20,9 tonna ınertti zattar, jeti myńnan astam qap daıyndalyp, 225,7 tonna janar-jaǵar maı qorlandy. Avarııalyq-qutqarý jumystaryna 1 628 adam men 406 dana tehnıka jumyldyrylatyn bolady. Bul oraıda IIM, TJM, «Medısınalyq qutqarý ortalyǵy» MM jáne «Qazavıaqutqarý» AQ qurylymdarynyń úlken kúshi kómekke keletindigin atap ótý lazym. Sý tasqynyna qarsy kúres bir mezettik nemese naýqandyq sıpat almaıtynyn eske salǵymyz keledi. Buǵan deıin mamandar 89 gıdroqurylymdy ınspeksııalyq tekseristen ótkizdi. Onyń qorytyndysymen Aqkól, Astrahan, Atbasar, Bulandy, Býrabaı, Jarqaıyń jáne Shortandy aýdandaryndaǵy 26 nysannyń jóndeý jumystaryn qajet etetindigi anyqtalǵan. Osyǵan baılanysty, ásirese, kez-kelgen sátte syr berýi múmkin 15 bóget nyǵaıtyldy. Oblys ákimi tarapynan basqa da nysandarǵa qatysty qarjylandyrý kózderi aıqyndalyp jatyr. Baqbergen Amalbek. Derek: egemen.kz. Sýret Ermurat Dosymov.