Anyǵynda, romanda ótpeli shaqtaǵy aýyl adamdarynyń basynan ótken qıyndyqtar baıandalǵan. Ondaǵy keıipkerler beınesi de tanys jandardaı jyly áser qaldyrdy. О́ıtkeni bizdiń oqýshy kezimiz 90-jyldardaǵy osy ýaqytpen tuspa-tus kelip, aýyldaǵy qıynshylyqty kórdik. Sonyń barlyǵy shyǵarmany oqyǵanda kóz aldymyzda kıno taspasyndaı tizbektelip ótip jatty.
Romanda týǵan jeriniń aıaq astynan eshkimge qajetsiz bolyp qalǵany aýyldaǵy sanaly jastardyń ashý-yzasyn týdyrdy. Sodan keıin olar qarsy áreketke kóshedi. Shyǵarmanyń ón boıynda on úsh qyzdyń joqtan bar jasaýǵa umtylysyn avtor óte nanymdy sýretteıdi. Oqyrmandy meılinshe sendiredi. Týyndydaǵy bas keıipkerdiń biri – Bıǵaısha Saqtapbergenqyzy. Aýyl jurtynyń jan-jaqqa kóship, týǵan jeriniń kóz aldynda tozyp bara jatqanyna jany kúızelgen boıjetken baqytty balalyq shaǵy ótken mekendi tastap kete almaıdy. Aqyry ózi sııaqty on eki qurbysymen birge aqyl qosyp, óz kúshterimen belsene iske kirisedi. Bas-aıaǵy jylǵa jetpeıtin ýaqytta aýyl eńsesin qaıta tikteıdi. Qysqasy, romanda on úsh qyzdyń erlikpen para-par eńbegi aıshyqty kórkemdelgen.
Osy kitapqa jazǵan alǵy sózinde belgili jazýshy, Memlekettik syılyqtyń laýreaty Turysbek Sáýketaı aýyldyń kúıreýi halqymyz úshin úlken rýhanı apat ekenin qalamger jany aýyryp jazǵanyn atap kórsetken.
«Ýaqytpen eseptespeı, kúndiz-túni bilekti sybanyp jumysqa kirisken on úsh qyzdyń hıkaıaty kúlli oblys kólemine tarap, kópshiliktiń rızashylyǵyna, qoldaýyna bólenedi. Baıaǵydaı týǵan aýyldyń tútini tik ushyp, aıdyń kólge aqqý oralatyndaı, tirshilik dýmany beınebir ertegideı ornyǵa bastaıdy. Jazýshy erlikke laıyq eńbegimen el tiregi bolýǵa umtylǵan osynaý jastardyń jasampazdyq ǵıbratyn óskeleń urpaqqa úlgi etip kórsetýdi maqsat tutqan. Shyntýaıtyna kelgende, bul shyǵarma órnekti órkendi ári sony dúnıe ekenin ashyp aıtýmyz kerek», dep laıyqty baǵa bergen.
Sondaı-aq bul kitapqa avtordyń at baptaýdyń qyr-syryn áńgimelegen «Ábýdiń qos kúreńi» hıkaıaty men Jumabaı Qartqojaq balasynyń basynan ótken ómiriniń shym-shytyryq oqıǵasyn arqaý etken «Qart chekıstiń áńgimesi» atty shyǵarmasy engen. Jaqynda qalamger redaksııaǵa bas suqqan edi. Sonda taǵy bir kólemdi dúnıe bastaǵanyn aıtty.
