Geologııa jáne mıneralogııa ǵylymdarynyń kandıdaty, professor Aqylbek Júnisov qazirgi tańda Qazaq ulttyq tehnıkalyq zertteý ýnıversıtetiniń Q.Turysov atyndaǵy Geologııa jáne munaı-gaz isi ınstıtýtynda «Paıdaly qazbalar ken oryndaryn geologııalyq túsirý, izdeý jáne barlaý» kafedrasynda qyzmet atqarady.
Ǵylym akademııasynyń prezıdenti Sh.Esenov Q.Sátbaev atyndaǵy Geologııa ǵylymdar ınstıtýtyndaǵy kómekshilerine QazPTI-di bıyl bitirgen qazaq jastaryn ǵylymǵa tartýǵa tapsyrys bergen eken. Osyndaı múmkindik bolashaq ǵalymnyń ómirin túbegeıli ózgertip, bizdiń keıipkerimiz atalǵan ınstıtýtqa jumysqa shaqyryldy. Osylaısha, otandyq geologııa ǵylymdarynyń qara shańyraǵyna ınjener bolyp qyzmetke ornalasady. Keıinen aǵa ınjener, kishi jáne aǵa ǵylymı qyzmetker retinde eńbek jolyn jalǵastyrady. Aqylbek Asyrarqululy atalǵan qyzmette 18 jyl boıy respýblıkamyzdyń temir ken oryndarynyń geologııasy men metallogenııasyn zertteý jumystarymen aınalysty. Zertteý jumystaryn Torǵaı temirli beldeýiniń (Sokolov, Sarybaı, Qashar, Qorjynkól jáne t.b.) kenoryndarynan bastap, Muǵaljardyń (Yrǵyz, Qııaqty), Qarsaqbaıdyń (Balbyraýyn, Keregetas), Soltústik Ulytaýdyń (Ashytasty), kendi Altaıdyń (Marqakól, Radıonov Log), Ile Alataýynyń Iirsý skarndi magnetıtti, temirli kvarsıtti, sıderıtti kenoryndary boıynsha qomaqty materıaldar jınaqtap, keıinnen osy aımaqtardyń temir kenderiniń bolashaǵy jaıly ǵylymı tujyrymdamalar jasaýǵa eleýli úlesin qosty.
Aqylbek Asyrarqululy geologııa-mıneralogııa ǵylymdarynyń kandıdaty ǵylymı dárejesin alý úshin «Yrǵyz sınklorııandaǵy Yrǵyz jáne Úshkól temir kenoryndarynyń geologııa-genetıkalyq erekshelikteri» taqyrybynda dıssertasııa qorǵady. 1980 jyly ózine júktelgen taqyrypty sátti qorǵap, KSRO Joǵary attestasııalyq komıtettiń sheshimimen geologııa-mıneralogııa ǵylymdarynyń kandıdaty ǵylymı dárejesin ıelenedi.
Ol 200-ge jýyq ǵylymı, ǵylymı-kópshilik, oqý-ádistemelik eńbekterdiń, sondaı-aq 4 oqýlyqtyń jeke jáne 2 monografııanyń qosymsha avtory. Ǵalymnyń ǵylymı jumystarynyń negizgi baǵyty temir kenoryndaryn zertteýmen baılanysty. Onyń eńbekteri joǵaryda aty atalǵan kenoryndarynyń geologııasy, genezısi, mıneraldyq-formasııalyq tıpteri, damýy jáne olardy keshendi túrde ıgerý máseleleri jaıynda boldy. Elimizdiń temirli kvarsıtteriniń qurylymdyq-lıtologııalyq oryndary anyqtalyp, temirli-kvarsıtti formasııa kenoryndarynyń geologııasy men mıneralogııasyn tııanaqty zertteýleriniń nátıjesinde ol elimizde alǵash ret ózindik stratıgrafııalyq oryny bar paleozoılyq marganesti-temirli-kremnııdi kendi formasııany zerttep, daralandy. Olardyń taralý aımaqtaryn aıqyndady. Oǵan basty sebep ózi zerttegen Ortalyq, Soltústik, Shyǵys Qazaqstannyń keıbir temirli kenoryndarynyń geologııalyq erekshelikteri edi. Aqylbek Asyrarqululynyń bul ǵylymı pikiri sol kezeńdegi KSRO kóleminde ótken ǵylymı konferensııalar barysynda áriptesteriniń úlken qoldaýyna ıe boldy.
Ǵalym mıneralogııalyq, petrografııalyq, geohımııalyq zertteýleri arqyly keıbir temir kenoryndaryn keshendi kenoryndar qataryna jatqyzýǵa bolatynyn dáleldedi. Mundaı kenoryndardy keshendi túrde ıgerý paıdaly qazbalar qoryn ósirip qana qoımaı, sol kendi aımaqtyń ekologııalyq jaǵdaıyn da jaqsartatyny jaıly óziniń ǵylymı pikirlerin bildirdi.
Sanaly ǵumyryn bilimge, ǵylymǵa arnaǵan ǵalym elimizdiń qazba baılyqtaryn ıgerý jolynda óz salasyn jetik meńgergen, zeıindi shákirt tárbıeleýdi maqsat tutty. 1995 jyly Q.Sátbaev atyndaǵy Qazaq ulttyq tehnıkalyq ýnıversıtetiniń «Geologııalyq túsirý, paıdaly qazba kenoryndaryn izdeý men barlaý» kafedrasynda dosent boldy. 2001–2003 jyldar «Geologııa jáne munaı-gaz isi» ınstıtýtynyń oqý-ádistemelik isi jónindegi dırektordyń orynbasary, dırektordyń mindetin atqarýshy qyzmetin atqarady. 2005–2016 jyldary «Geologııalyq túsirý, paıdaly qazba kenoryndaryn izdeý men barlaý» kafedrasynyń meńgerýshisi qyzmetin tabysty atqaryp, geologııa mamandyǵyna kadrlar daıarlaýda orasan zor eńbek etti. 2009 jyly QazUTÝ ǵylymı keńesiniń sheshimimen geologııa jáne mıneralogııa ǵylymdarynyń professory ataǵyn ıelendi. «Qazaqstan Ulttyq ensıklopedııasyna» «Geologııa jáne taý-ken isi» seksııasynyń avtorlarynyń biri retinde qatysty. О́miriniń 56 jylyn ǵylymǵa, onyń ishinde geologııa salasyna arnap kele jatqan ǵalymnyń eńbegi memlekettik deńgeıde baǵalandy. Bilikti tulǵa búgin de súıikti isinen qol úzgen emes.
