«Bul qadam memleket qarajatyn paıdalaný tıimdiligin arttyrýǵa múmkindik beredi. Ulttyq kompanııalardyń shottarynda «qajetsiz bos jatýdyń» ornyna qarjy bıýdjetke qaıtarylady. Nátıjesinde, qarajat anaǵurlym mańyzdy jáne shuǵyl mindetterge, mysaly, uzaqmerzimdi ınvestısııalyq jobalardy iske asyrýǵa baǵyttalýy múmkin. Mundaı tásil bıýdjet qarajatyn maqsatsyz nemese tıimsiz paıdalaný táýekelin azaıtýǵa, ashyqtyq pen eseptilikti kúsheıtýge múmkindik beredi. Kvazımemlekettik sektor uıymdary bólingen resýrstardy josparlaý men jumsaýǵa jaýaptylyqpen qaraıtyn bolady, sebebi paıdalanylmaǵan qaldyq endi jyl sońynda mindetti túrde qaıtarylýǵa tıis», delingen palata málimdemesinde.
Ekonomıst Rýslan Sultanovtyń aıtýynsha, buryn ulttyq kompanııalar «úlgermeı qaldyq», «joba áli bastalmady», «baǵyt ózgerip ketti» dep san túrli syltaýdy alǵa tartyp, aqshany qaıtarmaı kelse, endi ondaı túlki bulańǵa salýǵa jol berilmeıdi.
«Bıýdjet áldeqaıda «tiri» quralǵa aınalatyn boldy. Resýrstar ári-sári kúı keshpeı, qajet jerge baǵyttalady. Máselen, ınfraqurylymǵa, bilimge, densaýlyq saqtaýǵa nemese shok jaǵdaıyndaǵy ekonomıkany qoldaýǵa. Kvazımemlekettik sektordyń jaýapkershiligi de artady. «Bolashaqta ósýdi kózdep» nemese «saqtyq úshin» josparlaý endi bolmaıdy: Jumsamadyńyz ba, endeshe qazynaǵa qaıtaryńyz. Bul jalǵan smetalardy azaıtyp, shynaıy bıýdjet jumysyna yntalandyrady», deıdi sarapshy.
Biraq eskermeı ketýge bolatyn taǵy bir jaıt bar. Ol – ýaqytsha bos turǵan bıýdjet qarajatyn ornalastyrýdan túsken syıaqynyń (paıyzdyq tabys) endi ulttyq kompanııalarǵa emes, memleketke ótetini.
«Jańa Bıýdjet kodeksiniń 113-babyna sáıkes ulttyq poshta operatory, ekinshi deńgeıli bankter nemese ózge quraldardaǵy ýaqytsha bos bıýdjet qarajatyn depozıtke ornalastyrý jáne ınvestısııalaý arqyly alynǵan barlyq kirister endi ulttyq kompanııalardyń tabysy bolyp sanalmaıdy jáne dıvıdend retinde eseptelmeıdi. Olar respýblıkalyq bıýdjet kirisine aýdarylady. Buryn mundaı qarajat kóbine sol kompanııalardyń ózinde qalyp, bıýdjet qarajatynyń qaldyǵy men depozıtterden túsken syıaqy esebinen «passıvti» tabys ákeletin. Endi mundaı múmkindik alynyp tastaldy. Memleket is júzinde dıvıdendtik saıasatty aınalyp ótip, qarjylyq aıla-áreket jasaýǵa múmkindik beretin «joldy» jaýyp otyr. Kvazımemsektor úshin qatań bıýdjet erejesi jumys isteıdi. Memleket qarjysy bostan-bosqa olardyń shotynda jata bermeı, ne naqty baǵyt negizinde jumsalady, ne keri qaıtarylyp alynady», deıdi R.Sultanov.
