Foto: inbusiness.kz
Ekonomıkalyq ósimge úles qosatyn salanyń biri - mashına jasaý. Osy jyldyń alǵashqy alty aıynyń qorytyndysy boıynsha elimizde mashına jasaý óndirisi oń ósim kórsetken.
Mashına jasaý óńdeýshi ónerkásiptiń negizgi sektorynyń biri retinde jalpy kólemniń 19%-yn qamtamasyz etedi. О́sýdiń negizgi draıverleri: avtomobıl (+12,1%), temirjol jáne basqa da kólik quraldary (+7,1%), aýyl sharýashylyǵy tehnıkasy (+1,3%), elektrotehnıka (+21,5%), kompıýter, elektrondyq jáne optıkalyq jabdyq (ósim 1,7 ese) óndirisi, sondaı-aq mashına jáne jabdyq jóndeý men ornatý (+12%) salalarynda ekeni anyqtaldy.
Avtomobıl jasaý mashına jasaý kóleminiń shamamen 41%-yn quraıdy. Búginde elimizde JAC, Chevrolet, KIA, Lada, Jetour, Hongqi, Skoda, Hyundai jáne Genesis brendterin shyǵaratyn eki avtozaýyt jumys istep tur.
Bıyl Qazaqstanda taǵy eki jańa kásiporyn Almatydaǵy mýltıbrend zaýyty men Qostanaıdaǵy KIA zaýyty iske qosylady. Almatyda CHANGAN, Haval jáne CHERY sııaqty brendterdiń avtomobılderin shyǵarý josparlanǵan.
«Jańa qýattardy paıdalanýǵa berýdiń arqasynda elimizde shaǵyn toraptyq tehnologııa boıynsha jınalatyn avtomobıl óndirisiniń kólemi edáýir artady. Bul modelder qataryn kóbeıtýge jáne otandyq avtoónerkásiptiń pozısııasyn nyǵaıtýǵa múmkindik beredi», dedi ónerkásip jáne qurylys vıse-mınıstri Oljas Saparbekov.
2025 jyly Qazaqstanda 147 824 avtomobıl shyǵarý josparlanyp otyr. Vıse-mınıstr salada bul kórsetkishten asyp túsý úshin bar jaǵdaı jasalǵanyn atap ótti.
Onyń aıtýynsha, otandyq taýar óndirýshilerge sertıfıkat berýge baılanysty prosesti ońtaılandyrý kezinde qarqyndy ósirý múmkindigi joǵary.
Vıse-premer Serik Jumanǵarın saýda jáne ıntegrasııa mınıstrligine atalǵan ruqsat qujattamasyn jedel berý úshin shara qabyldaýdy tapsyrdy. Bul jańa modelderdiń serııalyq óndirisin ýaqtyly iske qosýǵa jáne mashına jasaý qýatynyń júktemesin arttyrýǵa múmkindik beredi.
