Saltanatty ashylý rásimine Jetisý oblysynyń ákimi Beıbit Isabaev, Ǵylym jáne joǵary bilim mınıstri Saıasat Nurbek, Italııanyń Qazaqstandaǵy Tótenshe jáne О́kiletti elshisi Antonello De Rıý, ǵalymdar, memleket jáne qoǵam qaıratkerleri, oqý ordasynyń professor-oqytýshylar quramy qatysty.
Is-sharada Ǵylym jáne joǵary bilim mınıstri Saıasat Nurbek sóz sóılep, fılıaldyń ashylýy eki eldiń joǵary oqý oryndarynyń tarıhynda erekshe oryn alatynyn aıtty.
«Jetisý oblysynda búgingi tańda «Agronomııa» jáne «Aýyl sharýashylyǵy ǵylymdary men tehnologııalary» baǵyttary boıynsha qos dıplomdyq baǵdarlamalar júzege asyrylyp jatyr. Qazirgi tańda jylyjaı keshenderine bilikti agronomdar men sıfrlyq tehnologııalardy meńgergen mamandar asa qajet. Osy turǵyda iske qosylǵan fılıal sol qajettilikti óteýge jasalǵan naqty qadam», dedi mınıstr.
Jetisý oblysy agrarlyq óńir bolǵandyqtan, fılıalda aýyl sharýashylyǵy, taǵam ınjerenııasy, týrızm, ekonomıka jáne sıfrlyq tehnologııalar boıynsha bilim berý baǵdarlamalary iske qosylady. Buǵan qosymsha atalǵan fılıal aldaǵy ýaqytta Jetisý oblysyn kásibı kadrlarmen qamtamasyz etýge mol múmkindik beredi.
Is-shara barysynda oblys basshysy Beıbit Isabaev: «Bizdiń óńir – agrarly aımaq. Sondyqtan bizge aýyl sharýashylyǵyna jańa ınnovasııalar men ozyq tehnologııalardy engizetin bilikti mamandar qajet. Osy maqsatta oblys ákimdigi alǵashqy kezeńde 14 stýdentke arnaıy grant bóldi. Marke polıtehnıkalyq ýnıversıtetiniń basshylyǵy men Ǵylym jáne joǵary bilim mınıstrligine osy mańyzdy jobany qoldaǵandary úshin shynaıy rızashylyǵymdy bildiremin», dedi.
О́z kezeginde Italııanyń Qazaqstandaǵy Elshisi Antonello De Rıý bul jobanyń Qazaqstan men Italııa arasyndaǵy ǵylym men joǵary bilim salasyndaǵy yntymaqtastyǵyn jańa deńgeıge kóterip, tyń serpin beretinin atap ótti.
«Jetisý ýnıversıtetimen áriptestik ornatý – Italııanyń halyqaralyq strategııasynyń mańyzdy bóligi. Biz bilim berý men ǵylymı zertteý salasynda birlesken jobalardy iske asyryp, tájirıbe almasý arqyly eki ýnıversıtettiń de áleýetin arttyramyz. Bul fılıaldyń ashylýy – tek jańa múmkindikterdiń bastaýy ǵana emes, Qazaqstan men Italııa arasyndaǵy dostyq pen yntymaqtastyqty nyǵaıtýdyń naqty qadamy», dedi elshi.
Aıta keteıik, fılıalda akademııalyq utqyrlyq baǵdarlamasy aıasynda Marke polıtehnıkalyq ýnıversıtetiniń ǵalymdary men professorlary dáris beredi. Sondaı-aq munda bilim alatyn stýdentter birlesken ǵylymı zertteýler júrgizýge, halyqaralyq tájirıbe almasý múmkindigine ıe bolady. Oqýyn sátti aıaqtaǵan túlekterge eki joǵary oqý ornynyń dıplomy beriledi.
