Este bolsa, ótken jyly Ǵylym jáne joǵary bilim mınıstri Saıasat Nurbek Memleket basshysy Qasym-Jomart Toqaevqa jasandy ıntellekt boıynsha «AI-Sana» baǵdarlamasyn engizýdi usynǵan edi. Keıin Úkimet jasandy ıntellekt salasyndaǵy mamandardy daıarlaýǵa baǵyttalǵan ınnovasııalyq AI-Sana baǵdarlamasyn iske asyrýdy bastady.
Ǵylym jáne joǵary bilim mınıstrligi taratqan aqparat boıynsha osynyń nátıjesinde búginde AI-Qabyldaý komıssııasy – talapkerlerge mamandyq tańdaýda tıimdi usynystar berip, sheshim qabyldaý ýaqytyn 50%-ǵa qysqartty. Buǵan qosymsha ýnıversıtet qyzmetkerleriniń jumys júktemesi 70 paıyzǵa jeńildetildi. Qazirgi tańda bul bastama 30 JOO-da iske asyrylyp jatyr.
AI-Proctoring – UBT jáne emtıhandardy qadaǵalaýda adam faktoryn azaıtyp, buzýshylyqtardy 90%-ǵa deıin tómendetti. Sondaı-aq baqylaý prosesi 80%-ǵa ońtaılanyp, testileý nátıjesine degen senim artty. Qazirgi ýaqytta atalǵan sheshimdi 5 ýnıversıtet qoldanyp keledi.
Al, AI-Check – jazbasha jumystardy tekserýdi avtomattandyryp, tekserý ýaqytyn 70 paıyzǵa, al shyǵyndardy 65 paıyzǵa deıin qysqartýǵa múmkindik berdi.
AI-Lector – oqytýshylarǵa beınedáris daıyndaý ýaqytyn 10 saǵattan 2 saǵatqa deıin qysqartyp, olardyń belsendiligin eki ese arttyrdy.
AI-Library – sıfrlyq kitaphana júıesi kitaphanashylardyń júktemesin 70%-ǵa, al paıdalanýshylardyń ýaqytyn 50%-ǵa azaıtty. Búginde bul baǵdarlamany 8 ýnıversıtet paıdalanyp otyr.
Sonymen qatar AI-Psıholog – stýdentter men oqytýshylarǵa psıhologııalyq qoldaý kórsetý jumystaryn 100%-ǵa oryndap, ákimshilik prosesterdi 65 paıyzǵa ońtaılandyrýǵa jol ashty.
Joǵaryda atalǵan kórsetkishter «AI-Sana» baǵdarlamasynyń tıimdiligin kórsetýde. Jasandy ıntellekt tehnologııalaryn engizý arqyly ýnıversıtetter bilim berý sapasyn arttyryp qana qoımaı, oqytýshylar men ákimshilik qyzmetkerlerdiń jumysyn jeńildetip, stýdentterdiń oqý prosesine belsendi qatysýyna yqpal etedi.
