Qasym-Jomart Toqaev Senatta málimdeme jasady

ASTANA. 19 naýryz. Parlament Senatynyń spıkeri Qasym-Jomart Toqaev palatanyń jalpy otyrysynda málimdeme jasady. Bul týraly Tengrinews.kz tilshisi habarlady. Qasym-Jomart Toqaev óziniń sózinde 11 naýryz kúni «Nur Otan» partııasy sezinde biraýyzdan usynylǵan qazirgi Memleket basshysy Nursultan Nazarbaevtyń aldaǵy saılaýdaǵy prezıdenttikke alǵashqy kandıdat retinde tirkelgenin eske saldy. «Elbasy partııa sezinde qazirgi kúrdeli álemdik jaǵdaıda Qazaqstan ekonomıkasynyń ósimin arttyrýdy qarastyratyn bes ınstıtýsıonaldyq reforma usyndy. Olar - qazirgi zamanǵy jáne kásibı memlekettik apparatty qalyptastyrý, zańnyń ústemdigi men ádil sotty qamtamasyz etý, biryńǵaı keleshekti, ashyq ári esepti memleketti turǵyzýǵa baǵyttalǵan ındýstrııalandyrý men ekonomıkany ártaraptandyrý jónindegi keshendi sharalar», - dedi ol. Senat spıkeri depýtattardy Nazarbaev ıdeıalaryn iske asyrýǵa barlyq kúshti jumsaýǵa shaqyrdy. «Memleket basshysynyń qoǵamnyń ishki saıası kelisimindegi el jetistikterine negizdelgen qazirgi bastamalary qoǵamnyń keleshektegi odan ári turaqty ekonomıkalyq jáne saıası damýy men Qazaqstan memlekettiliginiń nyǵaıýyna degen senimdi qalyptastyrady. Bul reformalardyń tabysty nátıjelerge qol jetkizýi halyqtyń berik erki men bıligi jaǵdaıynda ǵana qamtamasyz etilýi múmkin, bul - úlken syn jáne úlken jumys, ol bizge úlken jaýapkershilik júkteıdi. Qurmetti depýtattar, sizderdi «Máńgilik el» ıdeıasyn jáne Prezıdenttiń bizdiń aldymyzǵa qoıǵan keshendi mindetterin iske asyrýǵa kúsh salýǵa shaqyramyn», - dedi Toqaev. Eske salaıyq, Qazaqstan prezıdentiniń kezekten tys saılaýy 2015 jyldyń 26 sáýirinde ótedi. Ortalyq saılaý komıssııasy búginge deıin úsh kandıdatty tirkeýge aldy – «Nur Otan» partııasy atynan úmitker Nursultan Nazarbaev, Qazaqstan kommýnıstik halyq partııasynyń atynan úmitker Turǵyn Syzdyqov jáne ózin-ózi usynýshy Ábilǵazy Qusaıynov. Murat Aıtqoja. Derek, sýret: Tengrinews.kz.