Kásiporyndaǵy qurylys jumysy bıyl mamyrdyń aıaǵynda bitti. Sýdy tushytý, tuzsyzdandyrý jáne mıneraldandyrý sehtary, sorǵy stansasy, eki qosalqy stansa, jóndeý-mehanıkalyq sehy, garaj, qoımalar, zerthana men órt sóndirý beketi, qazandyq salyndy. Árbir nysan úshin eń qajetti nárse ınjenerlik-kommýnıkasııalyq ınfraqurylym desek, zaýytqa uzyndyǵy 80,1 shaqyrym elektr berý jelisi, jalpy uzyndyǵy 201,4 shaqyrym eki tarmaqty magıstraldy sý qubyry, 48,1 shaqyrym gaz qubyry, 40,1 shaqyrym avtojol salynyp, jobanyń teńiz bóligi boıynsha teńiz túbindegi transheıaǵa polıetılen qubyrlary tóseldi. Kásiporynda álemniń jetekshi óndirýshi kompanııalarynyń ozyq tehnologııalary qoldanylady.
Iske qosý-baptaý is-sharalary júrip jatqan zaýytta aldymen tehnologııalyq jabdyqtardyń búkil sıkli retteldi. Bul – teńiz sýyn tushytýǵa arnalǵan óndiristik jeli tekseriledi jáne jýylady degen sóz. 72 saǵatqa sozylatyn bul úrdisten soń synaq is-sharalary sátti aıaqtalǵan kezde zaýyt jumys rejimine kóshedi.
Zaýyttyń sýdy tazartý jáne tushytý jumysy kúrdeli. Mamandardyń aıtýynsha, aldymen zaýyttan 730 metr qashyqtyqta teńiz ústinde ornalasqan arnaıy sý jınaıtyn qurylǵy arqyly tereńdigi 12 metrlik qudyqqa kelip túsken teńiz sýy qondyrǵylardyń kómegimen qubyr arqyly kásiporynǵa jetedi. Tushytý sehynda laıdan tazartýǵa jáne basqa zattardy joıýǵa baǵyttalǵan birqatar prosedýradan ótken sý ózdiginen tazartatyn súzgilerge jiberiledi. Osydan keıin sý ýltra súzgileý úderisinen ótedi.
Bul tásil sý quramyndaǵy organıkalyq zattardy 70–75%-ǵa deıin tómendetýge jáne barlyq qospany, sonyń ishinde bakterııa, bir jasýshaly baldyr jáne basqa da elementterdi tolyq joıýǵa yqpal etedi. Sondaı-aq keri osmos tehnologııasy sý quramyn mıneraldy qospalardan tazartyp, 99,5% tushytýǵa múmkindik beredi. Al tushy sýdy joǵary sapaǵa jetkizý úshin remıneralızasııa prosesi júrgiziledi. Hlorlanǵannan keıin ol sý aýyzsý rezervýarlaryna jiberiledi.
Kópten kútken Kendirli sý tushytý zaýyty tolyq jobalyq qýatyna engende óńirde aýyz sý máselesine belgili mólsherde serpin bermek.
