Foto: Úkimet
Ulttyq banktiń málimetinshe, bıylǵy maýsym aıynyń qorytyndysy boıynsha ınflıasııa jyldyq mánde 11,8%-dy quraǵan. Bul kórsetkishke álemdik naryqtardyń turaqsyzdyǵy, tarıftik reformalar, tutynýshylyq suranystyń kúsheıýi jáne ınflıasııalyq joramaldar syndy birqatar syrtqy jáne ishki faktor áser etken.
Baǵanyń ósýin tejeý maqsatynda Úkimet Ulttyq bankpen jáne jergilikti atqarýshy organdarmen birlesken jumystardy qolǵa alǵan. Sonyń biri - Ulttyq Banktiń belsendi qatysýymen ınflıasııany baqylaý jáne tómendetý jónindegi qysqa ári uzaqmerzimdi qamtıtyn sharalar kesheni. Qujat qaraýdyń sońǵy satysynda tur jáne Úkimettiń jeke qaýlysymen qabyldanady. Negizgi baǵyttardyń qataryna ishki óndiristi ulǵaıtý, tarıftik saıasattyń boljamdylyǵyn arttyrý, bazalyq taýarlarǵa baǵany turaqtandyrý jáne ınflıasııalyq kútýlerdi tómendetý jatady. Sondaı-aq otandyq óndiristi qoldaý, ishki naryqty qamtý jáne saýda ústemelerin baqylaý jalǵasyp jatyr.
Ulttyq ekonomıka mınıstrliginiń aqparaty boıynsha, jyl basynan beri 15% shekti saýda ústemesin asyrǵany úshin 1 847 ákimshilik qaýly shyǵarylǵan. Retteletin kommýnaldyq qyzmetterge tarıfterdiń negizsiz ósýine jol bermeý boıynsha da jumystar júrgizilýde. Jyl basynan beri osy baǵyt boıynsha ınflıasııaǵa jıyntyq úles 0,5 paıyzdyq tarmaqshany quraǵan.
Jıynda 2023 jyly sharalar keshenin júzege asyrý ınflıasııalyq qysymdy 4,16 paıyzdyq tarmaqshaǵa, 2024 jyly 2,3 paıyzdyq tarmaqshaǵa tómendetýge múmkindik bergeni aıtyldy. Qazirgi ýaqytta sharalar kesheni ózektendirilip, 2026 jylǵa deıin uzartylǵan.
Saýda jáne ıntegrasııa mınıstrliginiń málimetinshe, Qazaqstan áleýmettik mańyzy bar azyq-túlik taýarlary boıynsha básekelestik baǵany saqtap otyr: sıyr etiniń quny EAEO jáne Ortalyq Azııa elderine qaraǵanda 30%-ǵa, kartop pen sábiz 38%-ǵa, pııaz 47%-ǵa, qyryqqabat 50%-ǵa tómen. Osy jyldyń basynan bastap naryqtyq baǵadan tómen baǵamen 3 myńnan astam aýyl sharýashylyǵy taýarlary jármeńkesi ótkizilgen. Salalyq odaqtarmen memorandýmdarǵa qol qoıylyp, sonyń nátıjesinde jumyrtqa baǵasy 8,7%-ǵa tómendegen. Maýsymnan tys ýaqytta baǵany turaqtandyrý úshin 30,3 myń jetkizip berý kelisimsharttary jasalǵan. Qytaıdan, Pákistannan jáne О́zbekstannan birneshe tonna erte pisetin kókónister jetkizilgen. О́nimderdi, onyń ishinde kartopty, analyq maldy jáne buqashyqtardy elden áketýge shekteýler engizilgen.
