Abaı kóshesiniń boıyndaǵy jańadan salynǵan kópqabatty turǵyn úıde 13 bir bólmeli, 13 eki bólmeli jáne úsh bólmeli alty páter bar. Merdiger «Samǵa» JShS úıdi óz qarajatyna saldy. Ákimdik Qurylys bólimi arqyly satyp alyp, aldymen kezekte turǵan áleýmettik osal top, kópbalaly ana jáne jetim sanatyna enetin turǵyndarǵa berdi.
Baspanaǵa jylý ortalyqtan keledi. Jaryq bar. Ystyq sý tıtanmen qamtamasyz etiledi. Káriz júıesi iske qosylǵan. Ázirge 12 otbasy jańa qonysqa kóshti. Buǵan deıin aýdan basyndaǵy Taıjan kóshesinde eki qabatty tórt úı qoldanysqa berilgen. Jambyl atyndaǵy kóshede salynǵan úı de áleýmettik osal topqa arnap satyp alyndy.
Aýdandyq turǵyn úı-kommýnaldyq sharýashylyǵy jolaýshylar kóligi avtomobıl joldary jáne turǵyn úı ınspeksııasy bóliminiń basshysy Sábden Boranbaıulynyń sózinshe, 2021 jyly – 24 páter, 2022 jyly – 48 páter, bıyl 32 páter berildi. Kópqabatty turǵyn úıdiń birinshi qabatyndaǵy 10 páterdi sala qyzmetkerlerine beriletin «qyzmettik jataqhana» retinde merdigerden satyp alý josparda bar.
«Baspanasy apatty jaǵdaıda dep sheshim shyqqan 11 turǵynǵa aýdanda bosap qalǵan úılerden beremiz. Salynǵan jańa páterden bere almaımyz. Bul úı zańmen bekitilgen áleýmettik osal toptarǵa arnalǵan. Taıaýda komıssııa otyrysy boldy, 11 adamnyń úsheýine bosaǵan úıdi jalǵa usynyp otyr. Jalǵa berilgen úılerdi keleshekte jekeshelendire alady. Bizde apatty jaǵdaıda turǵan eski jer úıler. Budan basqa bıyl oblıgasııalyq qaryzdar esebinen Ulytaý aýdanynda 164 mln teńgege 10 páter satyp alý josparlanǵan», deıdi.
Aýdan ortalyǵynda salynyp jatqan kommersııalyq 2 páterli 5 turǵyn úıdiń qurylysy qarqyndy júrip jatyr. Eki úıdiń qabyrǵasy kóterilip, tóbesi jabylyp, shatyry ornatylǵan. Al úshinshi úıdiń qabyrǵasyn kóterý jalǵasyp jatyr.
«Qaraǵandydaǵy «Turǵyn úı qory» kompanııasynyń qurylysshylary jumys istep jatyr. Ázirge 12 qurylysshy bar. Odan keıin ishki jumysy bastalǵanda ózge mamandardy tartamyz. Qurylysqa qajetti materıaldar qoljetimdi, bári de otandyq ónim. Gazblok tastar – Temirtaýdan, sement – Jezqazǵannan, shıki materıaldar ózimizdiń óńirden ákelinedi. Jyl sońyna deıin qoldanysqa berýdi josparlap otyrmyz», deıdi qurylys ýchaskesiniń basshysy Áltaıyr Rysqul.
Merdiger osy aýyldyń tehnıkalaryn jalǵa alyp otyr. Bir jaǵynan jastarǵa da jumys tabyldy. Bir tehnıkany jalǵa alý quny – aıyna 600–700 myń teńge shamasynda. Bir úıdiń quny 25 mln 200 myń teńgeni quraıdy. Bul – qaladaǵydaı ishinde sanýzel bar úsh bólmeli úıdiń baǵasy. Syrtyn qorshap, búkil jaǵdaıyn jasaǵan soń kiltin beredi.
Osy jyly aýdanǵa qarasty Jezdi kentinde 2 páterli 2 úı, Qarsaqbaı kentinde 2 páterli 1 úıdiń qurylysy bastalady. Qazir jer tańdalyp, zańdastyrý jumystary júrip jatyr.
Ulytaý oblysy
