Foto: Almaty qalasynyń ákimdigi
Qala ákimdiginiń habarlaýynsha, jobanyń negizgi maqsaty – Almatynyń joǵarǵy jáne tómengi bólikterin baılanystyratyn, turǵyndar men qala qonaqtary úshin qolaıly ári tartymdy zamanaýı qoǵamdyq keńistik qalyptastyrý.
«Qurylys jáne abattandyrý jumystary birneshe kezeńmen júrgiziledi. Alǵashqy kezeńde ál-Farabı dańǵylynan Abaı dańǵylyna deıingi ýchaske qamtylyp, abattandyrý jumystary bıyl aıaqtalady dep josparlanǵan», delingen habarlamada.
Sonymen qatar Esentaı ózeniniń jaǵalaýy boıynda jaıaý júrginshiler men velosıped joldary, jańa saıabaqtar, demalys oryndary, jasyl aımaqtar, kógaldandyrý elementteri, oryndyqtar, jaryqtandyrý, qalalyq ınfraqurylym jáne jastar men stýdentterge arnalǵan arnaıy aımaqtar salynady. Sondaı-aq tynyshtyqty qalaıtyn turǵyndarǵa arnalǵan relaksasııa keńistikteri, mádenı jáne belsendi demalys aımaqtary da eskeriledi.
Qala keńistigin damytý salasyndaǵy mamandardyń pikirinshe, Esentaı ózeni boıyndaǵy aımaqtyń áleýeti zor. Bul arna jasyl beldeýlerdi, turǵyn úı keshenderin, stýdenttik kampýstardy kesip ótedi jáne mádenı-sporttyq nysandarǵa jaqyn ornalasqan. Bos jatqan aýmaqtar jańa skverler, ekoparkter jáne týrıstik aımaqtar qurýǵa múmkindik beredi.
