Bas basylymnyń Qaraǵandy oblysy boıynsha 18 jylǵa jýyq menshikti tilshisi qyzmetin atqarǵan Aıqyn Nesipbaıdy áriptesteri qashanda kásibine adaldyǵy, qarapaıymdylyǵy men shyǵarmashylyq shynaıylyǵy úshin qurmet tutady.
Keshe jýrnalıstiń zeınet demalysyna shyǵý qurmetine uıymdastyrylǵan sharada «Egemen Qazaqstan» respýblıkalyq gazeti» aksıonerlik qoǵamynyń prezıdenti Saýytbek Abdrahmanov tilshiniń eńbek joly týraly tebireniske toly ádemi pikirler aıtty. Basylym basshysy sóziniń sońynda Arqanyń alqasy atanǵan Qarqaraly, Aqtoǵaı, Balqash syndy tabıǵaty tamyljyǵan óńirlerdiń kórkemdigin móldirete baıandap, sózben sýret sala bilgen qalam ıesine shyǵarmashylyq tabystar tiledi. Eske sala keteıik, Aıqyn Nesipbaı «Egemen Qazaqstan» gazetiniń menshikti tilshiligine 1997 jyly Qaraǵandy oblystyq «Ortalyq Qazaqstan» gazetiniń bólim meńgerýshisi qyzmetinen aýysqan bolatyn. Sodan bergi aralyqta áriptesimiz óńirdiń ekonomıkasy men áleýmettik máseleleri týraly, sondaı-aq, mádenı damýyndaǵy jetistikter jaıynda mazmundy da kókeıkesti ári ótkir maqalalar jarııalap, jylt etken jańalyqtyń jarshysy bola bildi. Ujymda árdaıym syıly, abyroıly, kishipeıil qalpymen erekshelengen tilshige egemenqazaqstandyqtar jyly tilekterin jetkizip, saltanatty jaǵdaıda zeınet demalysyna shyǵaryp saldy. Redaksııa qyzmetkerleri belgili jýrnalıske myqty densaýlyq, otbasyna baıandy baqyt tiledi.
«Egemen-aqparat».
