Jıynda sóz alǵan Premer-mınıstrdiń orynbasary Ermek Kósherbaev slet qatysýshylaryna sáttilik tileı otyryp, jumysshy mamandyqtarynyń el damýyna qosar úlesiniń erekshe ekenin atap ótti.
«Memleket basshysy 2025 jyldy Jumysshy mamandyqtary jyly dep jarııalady. Bul – tek bir salaǵa maman daıyndaý emes, el ekonomıkasynyń tiregi sanalatyn mamandyqtardyń mańyzyn qaıta baǵalaý. Birneshe jyl boıy jumysshy mamandyqtaryna degen kózqaras birjaqty stereotıpter arqyly qalyptasty. Alaıda búginde jaǵdaı ózgerdi. Jumysshy – zamanaýı tehnologııany meńgergen, eńbek naryǵynda suranysqa ıe, bilikti maman. Biz memleket retinde eńbekke laıyqty qurmet kórsetý úshin barlyq jaǵdaıdy jasap jatyrmyz. Sebebi jumysshy mamandarsyz ındýstrııalyq damý, óndiristi jańǵyrtý men ekonomıkalyq turaqtylyqty saqtaý múmkin emes. Bul ózgeristiń bel ortasynda sizder – jas mamandar tursyzdar», dedi E.Kósherbaev.
Oqý-aǵartý mınıstrligi taratqan aqparatqa súıensek, Jumysshy mamandyqtary jylynyń jartyjyldyq qorytyndysy kóńil kónshitedi. Aıtalyq, jyl basynan beri 8 myńnan kóp kásibı baǵdar berýshi pedagog daıarlandy, jańa oqý jylynda 700-den asa beıindi synyp ashylady, qazirgi tańda 352 synyp iske qosyldy. 1300 mektep oqýshysy jumysshy mamandyqtarynyń bazalyq daǵdylaryn meńgerip úlgerdi. Qamqorlyqqa alatyn kásiporyndar sany 7 ese ósti, mekemelermen jasalǵan dýaldy kelisim sany 2 esege artty, búginde 18 myń kásiporyn stýdentterdi dýaldy oqytý júıesimen daıarlap jatyr. 185 kolledjdiń materıaldyq-tehnıkalyq bazasy jańartylady, stýdentterdiń jataqhanamen qamtylýy 96%-ǵa jetedi. 1 qyrkúıekten bastap tehnıkalyq jáne kásiptik bilim berý uıymdaryna jan basyna shaqqandaǵy qarjylandyrý kólemi 437 myń teńgeden 912 myń teńgege deıin, ıaǵnı eki esege ulǵaıady.
Slette sóılegen Oqý-aǵartý mınıstri Ǵanı Beısembaev: «Búginde eńbek naryǵynda tek dıplom ǵana emes, naqty daǵdy mańyzdy. Qazaqstannyń tehnıkalyq jáne kásiptik bilim berý júıesi jańa deńgeıge kóterilip keledi. Qytaı, Fransııa, Túrkııa, Japonııa, Ulybrıtanııa, Grýzııa jáne basqa da eldermen birge 10 halyqaralyq joba iske qosylyp jatyr. Kolledjderdi halyqaralyq sertıfıkattaý alǵash ret qolǵa alyndy. Endi bizdiń stýdentter óz quzyretterin jahandyq standarttar boıynsha dáleldep, sheteldik taǵylymdamalarǵa, jumysqa jáne jahandyq eńbek naryǵyna shyǵý múmkindigine ıe bolady», dedi.
Sletke qatysýshylardyń arasynda Jambyl polıtehnıkalyq joǵary kolledjiniń 3-kýrs stýdenti Aıala Baıbolat ta bar. Ol grantta oqıdy, al Aıalanyń bilim alatyn kolledji ınternasıonaldandyrý jobasyna alǵashqylardyń biri bolyp engen.
«Prezıdent jumysshy mamandyqtary jylyn jarııalaǵanda mamandyǵymyz ben óz salamyz boıynsha isteıtin jumysymyzdyń shynymen de mańyzdy ekenin sezindik. Qazirgi kolledjder – bolashaǵy bar tańdaý. Bizde zamanaýı sheberhanalar ashylyp jatyr, halyqaralyq taǵylymdamalar uıymdastyrylyp turady, eń bastysy naqty múmkindikter bar. Bul senim men qoldaý úshin alǵys aıtamyn», dedi kolledj stýdenti.
Slet 3 kúnge sozyldy. Qatysýshylar motıvasııalyq kezdesýler, sheberlik sabaqtary, ınteraktıvti bilim bloktarynan ózine teorııalyq-iskerlik tájirıbe jınap, komandalyq tapsyrmalardy oryndaý arqyly shyńdap, mazmundy mádenı jáne sporttyq baǵdarlamaǵa atsalysty. Aıta keteıik, elimizde 772 kolledj bar, onda 550 myńnan asa stýdent bilim alyp júr.
