Foto: Oblys ákiminiń baspasóz qyzmeti
«Jeti adamdy órt shyqqan úıden alyp shyqqan batyldyqtaryńyz qandaı qurmetke de laıyq. Sizder jedel áreket etý arqyly úlken apatty jaǵdaıdyń aldyn alyp, tutas bir otbasynyń ómirin saqtap qaldyńyzdar. Bul erlikke teń is dep bilemiz. Sizderdi maqtan tutamyz», dedi oblys ákiminiń orynbasary M.Kólbaev.
Feldsher Ǵabıt Erǵaj oqıǵany baıandap berdi.
«Shaqyrtýmen Jetisý aýylyna baryp, endi jumysqa qaıtý úshin Qarabulaqqa qaraı burylmaqshy edik, joldyń Tekelige baratyn oń jaq baǵytynda tútin shyǵyp jatqandaı boldy, ony áýeli kólik júrgizýshisi baıqady. Sosyn burylyp, kóreıik dedik. Sol jerdegi oqshaý bir úıdegi qarııanyń sozylmaly syrqaty bar edi de, shaqyrtýmen jıi baratynbyz. Rasynda sol úıden órt shyǵyp jatyr eken. Uıyqtap jatqan úı ıelerin oıatyp, qujattaryn jyldam jınastyryp, 7 adamdy túgendep úıden alyp shyqtyq», deıdi Ǵ.Erǵaj.
Ǵabıt Erǵajdyń Jedel járdem qyzmetinde jumys istep júrgenine 8 jyl tolypty. Al Damıra Rahımovanyń Taldyqorǵan medısınalyq kolledjin támamdap, «Jastar praktıkasy» baǵdarlamasymen Jedel járdem stansııasynda tájirıbeden ótip júrgenine nebári úsh kún bolǵan eken. Al Murat Satekovtyń Jedel járdem kóligin júrgizgenine 16 jyl tolǵan. Kezdesýge qatysqan oblystyq jedel jáne shuǵyl medısınalyq járdem kórsetý stansııasynyń dırektory Savelıı Paktyń aıtýynsha, Jedel járdem kóliginiń júrgizýshileri alǵashqy medısınalyq kómek kórsetý turǵysynda arnaıy sertıfıkat alǵandyqtan, tolyqqandy kómek kórsete alady.
