Mańǵystaýda qıyrshyq tasty zańsyz óndiretin karerlerge shekteýler engiziledi

Qazir aýyl aýmaǵynda barlyǵy 25 jer qoı­naýyn paıdalanýshy tirkelgen bolsa, onyń ishinde 20 kásiporyn kelisimshart ne­gizinde, 5 kásiporyn lısenzııa negizinde jumys istep jatyr.

Mańǵystaý oblysy ákim­digi baspasóz qyzmetiniń habarlaýynsha, bul mańyzdy másele quzyrly oryndar nazarynda. Naqtyraq aıtsaq, birneshe jyl boıy shetpelik turǵyndar aýyl mańyndaǵy karerdegi ja­ry­lys jumystarynyń dúm­pýi­nen, shań-tozańnan, aýyr kólik­terdiń qozǵalysynan týyn­daı­tyn ekologııalyq, mate­rıal­dyq máselelerge shaǵymdanyp keledi.

Mańǵystaý oblystyq ta­bıǵı resýrstar jáne tabıǵat paıdalanýdy retteý basqarma­sy bıylǵy jartyjyldyqta karer­­lerdiń jumysyn baqy­laý maq­satynda arnaıy synama júrgizdi. Tekserý barysynda 16 núk­teden alynǵan 66 syna­manyń barlyǵy ekologııalyq normalarǵa sáı­kes kelgen. Sonymen qatar basqarma tarapynan 2023–2024 jyldar aralyǵynda Shetpe aýyly mańyndaǵy qıyrshyq tas óndiretin keshenderge jos­parly monıtorıng júrgizildi. Nátı­je­sinde, kelisimsharttyq min­dettemelerin oryndamaǵan 7 karer men ekologııalyq zań­nama talaptaryn buzǵan 11 karer anyqtaldy. Atalǵan kásip­oryndarǵa 2025 jylǵy shilde aıynda resmı eskertý hattary joldanyp, úsh aı ishinde anyqtalǵan buzýshylyqtardy joıý talaby qoıyldy. Zań talabyna sáıkes úsh aı merzim ishinde jer qoınaýyn paıdalanýshylar kelisimsharttyń, lısenzııanyń buzylǵan talaptaryn qalpyna keltirmegen jaǵdaıda, jer qoı­naýyn paıdalanýǵa berilgen lı­sen­zııalar qaıtarylyp, keli­sim­­sharttary birjaqty tártip­pen mer­ziminen buryn toqtatylady.

Muny Mańǵystaý oblystyq tabıǵı resýrstar jáne tabı­ǵat paı­dalanýdy retteý basqar­masy­nyń basshysy Sábıt Dúıse­kenov te rastady.

– Shetpe aýyly mańyndaǵy karer­lerdiń qyzmetin turaqty baqylaý maq­satynda Mańǵystaý oblysy ákiminiń ókimimen arnaıy jumys toby quryldy. Onyń quramyna quqyq qorǵaý organdary, ýákiletti memle­ket­tik organdar men jergilikti atqarýshy organdar kiredi. Bul jumys toby jer qoınaýyn paı­dalanýshylardyń qyzmetiniń zań talaptaryna saı bolýyn qa­da­ǵa­lamaq. Eger buzý­shy­lyqtar joıylmasa, tıisti sharalar qabyldanyp, zańǵa sáıkes karerlerge shekteýler engiziledi, – dedi S.Dúısekenov.

Osy kórsetilgen jer qoı­naýyn paıdalanýshylar tarapynan zańsyz óndirý jumystaryn júr­gizgendigi anyqtalǵan jaǵ­daıda 110 000 000 teńge aıyppul óndi­riledi dep josparlanyp otyr.

Mańǵystaý oblysy