Ken ornynyń ońtústik bóliginiń tolyq ıntegrasııasy arqyly KATKO jylyna 4 myń tonna ýran óndirý kórsetkishine qol jetkizýdi kózdep otyr. Joba 2021 jyly egjeı-tegjeıli jobalyq maquldaýdan ótken. 2023 jyly jańa zaýyttyń qurylysy bastalyp, úshjyldyq qysqa merzimde júzege asyryldy. Joba aıasynda gıdrotehnıkalyq jeliler, asfalt jáne qıyrshyq tasty joldar, elektr jelileri, jańa transformatorlyq qosalqy stansa salyndy.
«Ońtústik Tórtqudyq» jobasy óńirge aıtarlyqtaı ekonomıkalyq paıda ákelip, qyzmetkerlerdiń turmys jaǵdaıyn jaqsartty. Qurylys kezinde jergilikti merdigerlerge qosymsha jumys oryndary ashylyp, bir ýaqytta orta eseppen 600 adam jumys istedi.
Zaýyttyń ashylý saltanatyna Túrkistan oblysynyń ákimi Nuralhan Kósherov, Fransııanyń Qazaqstandaǵy elshisi Sılvan Gıoge, «KATKO» kompanııasynyń bas dırektory Paskal Basten, «Qazatomónerkásip» UAK» AQ Basqarma tóraǵasy Meıirjan Iýsýpov, Atom energetıkasy jónindegi memlekettik agenttik tóraǵasynyń orynbasary Ǵumar Serǵazın, «Orano Mining BU» kompanııasynyń bas dırektory Kzave San-Martan Tııe jáne ózge de tulǵalar qatysty.
«Qazatomónerkásip» – tabıǵı ýran óndirý salasynda elimizde ǵana emes dúnıejúzinde kóshbasshy kompanııalardyń biri. Túrkistan oblysynda atalǵan kompanııaǵa qarasty 10 tabıǵı ýran óndiris orny jumys isteıdi ári 1 kompanııa barlaý jumystaryn, 1 kompanııa elektr energııasyn tasymaldaý qyzmetin atqarady.
«Bul joba óndiris pen ishki, syrtqy naryqty joǵary sapaly ýranmen qamtamasyz etedi, jańa tehnologııalardy engizý arqyly ýrandy óndirýge baǵyttalady. Investısııalyq jobanyń qýattylyǵy – jylyna 2 000 tonna ýran óńdeý, quıylǵan ınvestısııa quny 74,7 mlrd. teńgeni qurady. Jańa jumys oryndary ashyldy. Oblys ákimdigi tarapynan atalǵan óndiriske 6 myń gektarǵa jýyq jer telimi bólindi jáne barlyq qajetti ınfraqurylymmen qamtamasyz etildi. О́ndiris oryndaryn ashý baǵytyndaǵy jumystar jalǵasady», dedi jobanyń mańyzyna toqtalǵan oblys ákimi.
«Qazatomónerkásip» basshysy Meıirjan Iýsýpovtyń aıtýynsha, «Ońtústik Tórtqudyq ýchaskesinde óńdeý zaýytynyń iske qosylýy tek «KATKO» úshin emes, elimizdiń búkil atom ónerkásibi úshin de mańyzdy oqıǵa. «Qazatomónerkásip» pen «Orano» arasyndaǵy uzaqmerzimdi strategııalyq seriktestiktiń nátıjesi. Sondaı-aq jańa óndiris ornynyń ashylý saltanatynda ýran salasynda jemisti eńbek etip júrgen azamattar marapattaldy.
Aıta keteıik, «KATKO» – Túrkistan oblysyndaǵy eń iri jumys berýshilerdiń biri. Kompanııa 1 300 adamdy jumyspen qamtamasyz etedi, olardyń 70%-dan astamy elimizdiń ońtústiginde jáne 52%-dan astamy Sozaq aýdanynda turady. Kompanııa qyzmetkerleriniń 99%-y el azamattary.
Túrkistan oblysy
