Foto: stat.gov.kz
Qazaqstan TMD óńirinde alǵash bolyp, EYDU-nyń statıstıka salasyndaǵy quqyqtyq qujatyn alǵan el atanyp otyr.
Atalǵan usynym – resmı statıstıkanyń táýelsizdigin, obektıvtiligin, ashyqtyǵy men sapasyn qamtamasyz etýge baǵyttalǵan 12 qaǵıdatty qamtıtyn halyqaralyq standart. Bul qujatqa qosylý Qazaqstannyń ulttyq statıstıkalyq júıesi EYDU-nyń negizgi talaptaryna saı keletinin jáne úzdik halyqaralyq tájirıbege sáıkes damyp jatqanyn ańǵartady.
«Biz yntymaqtastyǵymyzdy jalǵastyryp, sizdiń elińizde joǵary sapaly ári ınstıtýsıonaldyq turǵydan senimdi statıstıkalyq júıeni damytýdaǵy umtylysyńyzdy qoldaýǵa nıettimiz», dedi EYDU Bas hatshysy Matıas Kormann.
EYDU sheshimi 2023–2025 jyldarǵa arnalǵan Qazaqstannyń ulttyq statıstıkalyq júıesine júrgizilgen jan-jaqty sholý nátıjesinde qabyldanǵan. Qujatta statıstıkany sıfrlandyrý, zamanaýı ádisnamalardy engizý jáne paıdalanýshylardyń derekterge degen senimin arttyrý baǵytynda eldiń qol jetkizgen nátıjelerine nazar aýdarylǵan.
«Bul – Qazaqstannyń statıstıkalyq júıesine berilgen mańyzdy baǵa. Ol resýrstardyń jetkiliktiligi, qupııalylyqty saqtaý, turaqty quqyqtyq jáne ınstıtýsıonaldyq negizdiń bolýy, sondaı-aq jańa jáne balamaly derekkózderdi paıdalaný sııaqty talaptarǵa saı keletinin rastaıdy. Qujatta statıstıka sapasynyń taldaý men basqarýshylyq sheshimderdiń sapasyna tikeleı áser etetini atap kórsetilgen. Biz osy mejeni saqtap qalýǵa jáne odan ári jetildire berýge nıettimiz», dedi QR Strategııalyq josparlaý jáne reformalar agenttigi Ulttyq statıstıka bıýrosynyń basshysy Maqsat Turlybaev.
Aıta keteıik, Qazaqstannyń atalǵan usynymǵa qosylý jumysy Syrtqy ister mınıstrliginiń qoldaýymen júzege asyrylǵan.
