Sýret: stat.gov.kz
Mámile Mańǵystaý oblysynyń ákimi Nurdáýlet Qılybaı men «Condor Energies» kompanııalar tobynyń basqarýshy dırektory, «Qazaq LNG» JShS bas dırektory Norman Shtorm kezdesýinde naqtylandy. О́ńirde birqatar iri ınvestısııalyq jobany iske asyrý máselesin talqylaǵan basqosýda taraptar eki mańyzdy jobanyń júzege asyrylý barysy týraly sóılesti. Kompanııa qolǵa alatyn jobanyń biri – Qaraqııa aýdany Quryq porty mańynda jylyna 145 myń tonna suıytylǵan tabıǵı gaz óndiretin zaýyt. Jalpy aýmaǵy 16 gektardy quraıtyn bul joba aıasyndaǵy zaýyt qurylysy kezeńinde 300 adam jumyspen qamtylyp, 2027 jyly paıdalanýǵa berilgen soń, 100 turaqty jumys orny ashylady. Osylaısha, «Condor Energies» kompanııalar toby Ortalyq Azııadaǵy alǵashqy suıytylǵan tabıǵı gaz zaýytyn elimizde iske qosý josparyn júzege asyrýǵa yntaly.
Sonymen birge hımııa ónerkásibi, energetıka jáne kólik salasynda keńinen qoldanylatyn mańyzdy shıkizat – metanol óndiretin zaýyt salý jaıy kelisildi. Zaýyt qurylysy kezeńinde 350 adam jumyspen qamtylsa, iske qosylǵan soń, 200 turaqty jumys orny ashylmaq. Bul joba da 2027 jyly paıdalanýǵa beriledi dep josparlanǵan.
«Biz árdaıym ózara tıimdi yntymaqtastyqty damytýǵa daıynbyz. Zańnamada kózdelgen barlyq qajetti sharany qarastyra otyryp, memlekettik qurylymdarmen birlese tıisti qoldaý kórsetýge ázirmiz. Sonymen qatar sizderdi jáne seriktesterińizdi óńir ekonomıkasynyń basqa da salalarynda, atap aıtqanda óńdeý ónerkásibi, kólik jáne logıstıka baǵyttarynda birlesken jobalardy iske asyrý múmkindikterin qarastyrýǵa shaqyramyn. Biz birlese jumys isteýge árqashan daıynbyz», dedi oblys ákimi Nurdáýlet Qılybaı.
Mańǵystaý oblysy
