H.Dosmuhamedov atyndaǵy Atyraý ýnıversıtetiniń arheologi Amangeldi Muǵaýulynyń aıtýynsha, bul monetalardaǵy bederli tańbalardy nýmızmatıka professory Pavel Petrov zerttegen. Kúmis tıyndar Joshy ulysy kezinde qurylǵan Altyn orda memleketiniń bıleýshisi Meńgý-Temir han tusynda quıylǵan aqsha tobyna jatady.
«Bul tıyndar belgili nýmızmatık ǵalym Pavel Petrovtyń paıymdaýynsha, HIII ǵasyrdyń ekinshi jartysyna sáıkes keledi. Quıma aqshanyń bir betinde Meńgý-Temir hannyń tańbalary bar. Al ekinshi jaǵynda Qytaı ıeroglıfteri beınelengen. Munyń sebebin Shyǵyshannan taraǵan Qubylaı urpaqtary men Shaǵataı ulysy arasyndaǵy qaqtyǵystarda qolǵa túsken tutqyn Nomýhanmen baılanystyrýǵa bolady», dedi Amangeldi Muǵaýuly.
Tarıhı qalashyqtaǵy qazba ornynan kóne ydys tabylyp otyr. Mundaı ydys Taǵara dep atalady.
Oblystyq tarıhı-mádenı muralardy zertteý ortalyǵynyń basshysy Tolybaı Dostybaevtyń pikirinshe, keıingi jyldary atalǵan qalashyqty zertteýge den qoıylǵan. Osy kezge deıin qalashyqtyń 53 gektar aýmaǵy tolyqtaı qorshalyp tur. Aldaǵy jyldary munda ashyq aspan astyndaǵy mýzeı jasaqtalady.
«Bıyl tarıhı qalashyqtaǵy arheologııalyq zertteý jumysyna H.Dosmuhamedov Atyraý ýnıversıtetiniń stýdentteri tartyldy. Kóne qalashyqtyń 500 sharshy metr aýmaǵynan tabylǵan jádigerler oqý ordasynyń zerthanasynda zertteledi», deıdi T.Dostybaev.
Atyraý oblysy
