О́zbekstan Respýblıkasy Prezıdentiniń Jarlyǵymen 2021 jyldan bastap 30 shilde – О́zbekstandaǵy «Halyqtar dostyǵy kúni» bolyp jarııalanǵan. Osyǵan oraı baýyrlas memleket merekeni bir apta boıy keń kólemde atap ótedi. Festıval barysynda túrli ultqa tán bıler men ásem án-kúıler, qolóner buıymdary jáne mádenı kórmeler usynylyp, eldegi beıbitshilik pen tatýlyq rýhy keńinen nasıhattalady.
Is-sharanyń alǵashqy kúni Tashkent qalasynda Ulttyq mádenı ortalyqtar pavılondarynyń saltanatty ashylýy ótti. Olar túrli ult pen ulystardyń dástúri men salt-ǵurpy, tarıhy men mádenıeti eskerilip jasalǵan.
«Elimizde 130-dan asa ult pen ulys ókilderiniń ómir súrýi bul óńirde ejelden dostyq, beıbitshilik pen tózimdilik ústem bolǵanyn kórsetedi. Biz ártúrli tilde sóıleımiz. Salt-dástúrlerimiz de ózgeshe. Biraq bir-birimizdi óte jaqsy túsinemiz. Sebebi bizdiń ortaq Otanymyz – О́zbekstan. 85 jyldan beri koreıler О́zbekstanda ómir súrip keledi. Olar О́zbekstandy óz Otany dep biledi, Al astanamyzda salynǵan ulttyq mádenı ortalyqtarǵa arnalǵan biregeı pavılondar – qamqorlyqtyń, birliktiń taǵy bir naqty kórinisi», dedi О́zbekstan Koreı ulttyq-mádenı ortalyqtary qaýymdastyǵynyń tóraǵasy Vıktor Pak. Is-sharada ulttyq mádenı ortalyqtar kórkemónerpazdar ujymdarynyń konserttik baǵdarlamasy da kórsetildi. Saltanatty jıynda alys-jaqynnan kelgen mártebeli meımandar sóz sóılep, izgi bastamanyń mereıin asyrdy.
