Foto: ratel.kz
Prokýratýra organdarynyń úılestirýimen esirtki jáne psıhotroptyq zattardy jetkizýdiń 111 arnasynyń joly kesildi. Sıntetıkalyq esirtki óndiretin 21 zerthana jáne quramynda esirtki zattary bar ósimdikterdi zańsyz ósirýdiń 125 (45) faktisi anyqtalyp, joıylǵan. Zańsyz aınalymnan 9 tonna esirtki (onyń ishinde 254 kg sıntetıkalyq esirtki) jáne 12 tonna (105 kg) prekýrsorlar tárkilengen. Esirtki jáne prekýrsorlar kontrabandasynyń faktileri 182-den 80-ge deıin, 56%-ǵa tómendegen.
Sondaı-aq, quny 2,3 mıllıard teńgeden asatyn 98 myńnan astam esirtki shoty buǵattalǵan.
«Barlyq is boıynsha qarjylyq tergeý júrgizý, sonyń ishinde, qylmystyq aqshany, esirtki bıznesiniń túpkilikti benefısıarlary men uıymdastyrýshylaryn, sondaı-aq «dropper» aýdarymdary jáne basqa da zańsyz operasııalar úshin banktik shottaryn usynatyn azamattardy anyqtaý týraly nusqaý berildi», delingen Bas prokýratýra habarlamasynda.
Quqyq qorǵaý jáne memlekettik organdar «Kıbernadzor» aqparattyq júıesi arqyly esirtki dúkenderin buǵattaý jumystaryn júrgizip jatyr. Búginde 6 myńnan astam esirtki saıty buǵattalǵan.
