Dúnıejúzilik saýda uıymyna kirý jónindegi kelissózderdiń aıaqtalýyna baılanysty Memleket basshysy N.Á.Nazarbaevtyń Qazaqstan halqyna ÚNDEÝI

Qurmetti qazaqstandyqtar! Elimiz asa mańyzdy taǵy bir tarıhı oqıǵa qarsańynda tur. Biz Dúnıejúzilik saý­da uıymyna kirý jónindegi kelissózderdi tabysty aıaqtadyq. Dúnıejúzilik saýda uıymyna múshe bolý bizdiń ekonomıkamyz­dy jańa kókjıekterge bastaıdy. Kásip­oryn­darymyzdyń shetel naryqtaryna shy­ǵýyn qamtamasyz etedi. Al tutyný­shy­lar úshin taýarlar men qyzmetterdiń keń aýqymyna tańdaý jasaýǵa jol ashady. Búginde saýda-sattyǵymyzdyń 90 paıy­zy Dúnıejúzilik saýda uıymyna múshe elderge tıesili. Qazaqstan sheteldik ınvestorlar men seriktester úshin burynǵydan da tartymdy bola túsedi. Jańa óndirister men jumys oryndaryn ashýǵa múmkindikter týady. Biz bul nátıjege jetý úshin 19 jyl tabandy túrde jumys júrgizdik, kelissózder ońaı bolǵan joq. Osy jyldary bizdiń Úkimet jáne sarapshylarymyz elimizge tıimdi sharttarǵa qol jetkizý úshin talmaı eńbek etti. Biz Dúnıejúzilik saýda uıymy men Eýrazııalyq ekonomıkalyq odaqtyń talaptaryn ushtastyra aldyq. Bul rette ulttyq múddelerimizdi de qorǵaı bildik. DSU-ǵa múshe bolý – kúlli Qa­zaq­stan­nyń jeńisi. Bul – elimizdiń jahan­dyq eko­no­mıkanyń bólinbes bólshe­gi retinde moıyndalýynyń aıǵaǵy. Uıym mú­sheligine bes halyqtyq reformany is­ke asyrýǵa kirisken kezeńde qadam basýy­myzdyń sımvoldyq máni bar. Biz jahandyq naryq sharttaryna saı bolý úshin úlken daıyndyqtan óttik. Otandyq óndirýshilerge qoldaý kórsetip, bıznes úshin qolaıly jaǵdaılar jasadyq. Birtutas kedendik jáne ekonomıkalyq keńistikte shyńdaldyq. Aldymyzda áli de aýqymdy jumystar kútip tur. Báseke kúsheıedi. Oǵan daıyn bolýymyz kerek. Sebebi, shetelderden keletin taýarlarǵa biz shekaramyzdy ashamyz, taýar Qazaqstanǵa kóptep keletin bolady. Sapasy joǵary bolsa, baǵasy tómendeý bolsa, ol taýarlardy halyq tutynyp, bizdiń taýar óndiretin kásiporyndar jumysynyń toqtap qalý qaýpi bar. Barlyq bıznesmenderge meniń talaıdan beri aıtyp kele jatqanym sondyqtan: básekege saı bolý kerek. DSU beretin artyqshylyqtardy paıdalana biletinimizdi dáleldeý qajet bolady. Bul Qazaqstannyń qolynan keledi jáne biz álemniń ozyq elderi qatarynan laıyqty oryn alamyz dep kámil senemin.